കോഴിക്കോട്: മെഡിക്കൽ കോളേജ് ആശുപത്രിയിലെ രോഗികൾക്കും കൂട്ടിരിപ്പുകാർക്കും ഉച്ചഭക്ഷണം വിതരണം ചെയ്യുന്ന ഡിവൈഎഫ്ഐയുടെ ‘ഹൃദയപൂർവം’ പദ്ധതി നൂറ് ദിവസം പിന്നിടുന്നു. രണ്ടര ലക്ഷത്തിൽപ്പരം പൊതിച്ചോറുകളാണ് ആശുപത്രിയിൽ ഇതുവരെ ഡിവൈഎഫ്ഐ വിതരണം ചെയ്‌തത്‌.
ഡിവൈഎഫ്ഐ മേഖല കമ്മറ്റികൾക്ക് കീഴിലെ യൂണിറ്റുകളിലുള്ള വീടുകളിൽ നിന്നാണ് പ്രവർത്തകർ പൊതിച്ചോറ് ശേഖരിക്കുന്നത്. ഓരോ ദിവസവും മൂവായിരത്തിലധികം ഭക്ഷണപ്പൊതികളാണ് പ്രവർത്തകർ നേരിട്ടെത്തി സംഘടിപ്പിക്കുന്നത്. ഇവ പിന്നീട് വാഹനങ്ങളിലാക്കി മെഡിക്കൽ കോളേജിൽ എത്തിക്കും. വയറെരിയുന്നവരുടെ മിഴി നിറയാതിരിക്കാനുള്ള കരുതലാണിതെന്ന് ഡിവൈഎഫ്ഐ പ്രവർത്തകർ പറയുന്നു.
2021 ഓഗസ്‌റ്റ് 21 മുതലാണ് ഡിവൈഎഫ്ഐ കോഴിക്കോട് ജില്ലാ കമ്മറ്റിയുടെ നേതൃത്വത്തിൽ പൊതിച്ചോറ് വിതരണം തുടങ്ങിയത്. കോവിഡ് കാലത്ത് തൊഴിൽ നഷ്‌ടപ്പെട്ടവരടക്കമുള്ള രോഗികൾക്കും കൂട്ടിരിപ്പുകാർക്കും പദ്ധതി ഏറെ സഹായകരമായി. തൊഴിലൊന്നുമില്ലാതെ മെഡിക്കൽ കോളേജ് പരിസരത്ത് കഴിയുന്ന രോഗികളല്ലാത്തവരും ഇവിടെയെത്തി ഭക്ഷണം കഴിക്കുന്നുണ്ട്.
Most Read: വാക്‌സിനെടുത്തു; യുവതിയുടെ കയ്യിലെത്തിയത് കോടികൾ, ഭാഗ്യം വന്ന വഴി
