ട്രെയിൻ ടിക്കറ്റ് ബുക്കിങ്ങിൽ വീഴ്ച; ട്രാവൽസ് ഏജൻസിക്ക് ഒരുലക്ഷം രൂപ പിഴ വിധിച്ചു
തിരൂർ അന്നാര സ്വദേശി രവീന്ദ്രനാഥൻ നൽകിയ ഹരജിയിൽ തിരൂർ സ്കൈ ബിസ് ട്രാവൽസ് ഏജൻസിക്കാണ് മലപ്പുറം ജില്ലാ ഉപഭോക്തൃ കമ്മീഷൻ ഒരുലക്ഷം രൂപ നഷ്ടപരിഹാരവും 5000 രൂപ കോടതി ചിലവും നൽകാൻ വിധിച്ചത്.
മലപ്പുറം: ട്രെയിൻ ടിക്കറ്റ് ബുക്ക് ചെയ്യുന്നതിൽ വീഴ്ച വരുത്തിയ ട്രാവൽസ് ഏജൻസിക്ക് പിഴയും നഷ്ടപരിഹാരവും വിധിച്ചു മലപ്പുറം ജില്ലാ ഉപഭോക്തൃ കമ്മീഷൻ. തിരൂർ അന്നാര സ്വദേശി രവീന്ദ്രനാഥൻ നൽകിയ ഹരജിയിൽ തിരൂർ സ്കൈ ബിസ് ട്രാവൽസ് ഏജൻസിക്കാണ് കമ്മീഷൻ ഒരുലക്ഷം രൂപ നഷ്ടപരിഹാരവും 5000 രൂപ കോടതി ചിലവും നൽകാൻ വിധിച്ചത്.
ചെന്നൈയിൽ നടക്കുന്ന വിവാഹ ചടങ്ങിൽ പങ്കെടുക്കുന്നതിനും തിരിച്ചുമുള്ള യാത്രക്കും ബന്ധുക്കളായ 42 പേർക്ക് തൃശൂർ, എറണാകുളം, ആലപ്പുഴ, തിരുവനന്തപുരം എന്നിവിടങ്ങളിൽ നിന്നും ട്രെയിൻ ടിക്കറ്റ് ബുക്ക് ചെയ്യുന്നതിന് 95,680 രൂപ രവീന്ദ്രനാഥൻ ട്രാവൽ ഏജൻസിക്ക് നൽകിയെങ്കിലും ടിക്കറ്റ് ബുക്ക് ചെയ്യാതെ പരാതിക്കാരനെ കബളിപ്പിക്കുകയായിരുന്നു.
ഇതിന് ശേഷം നൽകിയ തുക തിരിച്ചു നൽകാൻ ആവശ്യപ്പെട്ടെങ്കിലും നൽകാത്തതിനെ തുടർന്ന് ട്രാവൽ ഏജൻസിക്കെതിരെ രവീന്ദ്രനാഥൻ മലപ്പുറം ജില്ലാ ഉപഭോക്തൃ കമ്മീഷനെ സമീപിച്ചു. ഇതോടെ, ടിക്കറ്റിനായി നൽകിയ 95,680 രൂപ തിരിച്ചു നൽകുന്നതിനും സേവനത്തിൽ വീഴ്ച വരുത്തി പരാതിക്കാരനും ബന്ധുക്കൾക്കും പ്രയാസമുണ്ടാക്കിയതിന് ഒരുലക്ഷം രൂപ നഷ്ടപരിഹാരവും കോടതി ചിലവിനായി 5000 രൂപയും നൽകുന്നതിന് കമ്മീഷൻ ഉത്തരവിടുകയായിരുന്നു.
കെ മോഹൻദാസ് പ്രസിഡണ്ടും പ്രീതി ശിവരാമൻ, സിവി മുഹമ്മദ് ഇസ്മായിൽ എന്നിവർ അംഗങ്ങളുമായ കമ്മീഷന്റേതാണ് വിധി. ഒരുമാസത്തിനകം ഉത്തരവ് നടപ്പിലാക്കാത്തപക്ഷം വിധി പ്രകാരമുള്ള സംഖ്യക്ക് 12 ശതമാനം പലിശ നൽകണമെന്നും ഉത്തരവിൽ പറയുന്നുണ്ട്.
അഭിപ്രായങ്ങളുടെ ആധികാരികത ഉറപ്പിക്കുന്നതിന് വേണ്ടി കൃത്യമായ ഇ-മെയിൽ വിലാസവും ഫോട്ടോയും ഉൾപ്പെടുത്താൻ ശ്രമിക്കുക. രേഖപ്പെടുത്തപ്പെടുന്ന അഭിപ്രായങ്ങളിൽ 'ഏറ്റവും മികച്ചതെന്ന് ഞങ്ങളുടെ എഡിറ്റോറിയൽ ബോർഡിന്' തോന്നുന്നത് പൊതു ശബ്ദം എന്ന കോളത്തിലും സാമൂഹിക മാദ്ധ്യമങ്ങളിലും ഉൾപ്പെടുത്തും. ആവശ്യമെങ്കിൽ എഡിറ്റ് ചെയ്യും. ശ്രദ്ധിക്കുക; മലബാർ ന്യൂസ് നടത്തുന്ന അഭിപ്രായ പ്രകടനങ്ങളല്ല ഇവിടെ പോസ്റ്റ് ചെയ്യുന്നത്. ഇവയുടെ പൂർണ ഉത്തരവാദിത്തം രചയിതാവിനായിരിക്കും. അധിക്ഷേപങ്ങളും അശ്ളീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്.
