തിരുവനന്തപുരം : സംസ്ഥാനത്തിന്റെ വിവിധ ഭാഗങ്ങളില് ഇന്നും ശക്തമായ മഴ തുടരുമെന്ന് കാലാവസ്ഥാ കേന്ദ്രം അറിയിച്ചു. തെക്കന് ജില്ലകളില് കഴിഞ്ഞ ദിവസം മുതല് കനത്ത മഴ തുടരുകയാണ്. തിരുവനന്തപുരം, കൊല്ലം, ആലപ്പുഴ, മലപ്പുറം ജില്ലകളില് ഇന്ന് ഓറഞ്ച് അലര്ട്ട് പ്രഖ്യാപിച്ചു. ഒപ്പം തന്നെ പത്തനംതിട്ട, കോട്ടയം, എറണാകുളം, ഇടുക്കി, തൃശൂര്, കോഴിക്കോട്, വയനാട്, കണ്ണൂര് തുടങ്ങിയ ജില്ലകളില് യെല്ലോ അലര്ട്ടും പ്രഖ്യാപിച്ചിട്ടുണ്ട്.
അറബിക്കടലിന്റെ തെക്ക് കിഴക്കന് ഭാഗത്ത് രൂപം കൊണ്ട ന്യൂനമര്ദ്ദമാണ് ശക്തമായ മഴക്ക് കാരണം. അടുത്ത കുറച്ചു മണിക്കൂറുകള്ക്കുള്ളില് ന്യൂനമര്ദ്ദം ദുര്ബലമായേക്കുമെന്ന് കാലാവസ്ഥാ കേന്ദ്രം വ്യക്തമാക്കി. സംസ്ഥാനത്ത് നാളെയും പത്തനംതിട്ട ഒഴികെയുള്ള എല്ലാ ജില്ലകളിലും മഴ തുടരുമെന്നാണ് വിലയിരുത്തുന്നത്. ന്യൂനമര്ദ്ദം ശക്തമായതോടെ മത്സ്യത്തൊഴിലാളികള് കടലില് പോകരുതെന്നും നിര്ദ്ദേശം നല്കിയിട്ടുണ്ട്. തീരങ്ങളില് കഴിഞ്ഞ ദിവസങ്ങളില് ശക്തമായ കാറ്റും തിരമാലകളും ഉണ്ടായിട്ടുണ്ട്. അതിനാല് മത്സ്യത്തൊഴിലാളികള് ജാഗ്രത പാലിക്കണമെന്നും, തീരദേശങ്ങളില് താമസിക്കുന്ന ആളുകള് സുരക്ഷ മുന്കരുതലുകള് ഉറപ്പ് വരുത്തണമെന്നും കാലാവസ്ഥാ വകുപ്പ് അറിയിച്ചു.