തിരുവനന്തപുരം : അറബിക്കടലിൽ ന്യൂനമർദ്ദം രൂപപ്പെട്ടതിനെ തുടർന്ന് കേരളത്തിലെ വിവിധ ജില്ലകളിൽ റെഡ് അലേർട്ട് പ്രഖ്യാപിച്ച് കേന്ദ്ര കാലാവസ്‌ഥാ കേന്ദ്രം. തിരുവനന്തപുരം, കൊല്ലം, പത്തനംതിട്ട എന്നീ ജില്ലകളിലാണ് നാളെ റെഡ് അലേർട്ട്. അതിതീവ്ര മഴക്കുള്ള സാധ്യത ഉള്ളതിനാലാണ് റെഡ് അലേർട്ട് പ്രഖ്യാപിച്ചിരിക്കുന്നത്. 24 മണിക്കൂറിൽ 204 മില്ലി മീറ്ററിന് മുകളിലുള്ള മഴ ലഭിക്കാനാണ് സാധ്യത. ഇത്തരത്തിലുള്ള മഴ അപകടകാരിയാണെന്നും, അതിനാൽ പൊതുജനങ്ങളും സർക്കാർ സംവിധാനങ്ങളും തയ്യാറെടുപ്പുകൾ നടത്തണമെന്നും കാലാവസ്‌ഥാ വകുപ്പ് വ്യക്‌തമാക്കി.
ന്യൂനമർദ്ദം ചുഴലിക്കാറ്റായി മാറുകയും കേരള തീരത്തിനടുത്ത് കൂടി കടന്ന് പോവുകയും ചെയ്യാൻ സാധ്യതയുള്ളതിനാൽ കേരളത്തിൽ വ്യപകമായി ശക്‌തമായ കാറ്റും മഴയും കടൽക്ഷോഭവും ഉണ്ടാകാൻ സാധ്യതയുണ്ട്. അധികൃതരുടെ നിർദ്ദേശമനുസരിച്ച് പ്രശ്‌നബാധിത മേഖലകളിൽ നിന്നും ആളുകൾ മാറി താമസിക്കണമെന്നും, മൽസ്യ തൊഴിലാളികൾ 14ആം തീയതി വരെ കടലിൽ പോകുന്നത് പൂർണമായും വിലക്കിയിട്ടുണ്ടെന്നും പൊതുജനങ്ങൾക്ക് നിർദ്ദേശം നൽകി.
പ്രശ്‌നബാധിത പ്രദേശങ്ങളിൽ നിന്നും മാറിത്താമസിക്കുന്ന ആളുകൾ കോവിഡ് മാനദണ്ഡങ്ങൾ പൂർണമായും പാലിക്കണമെന്നും, ദുരന്ത സാധ്യതയുള്ള മേഖലകളിൽ താമസിക്കുന്നവർ ഒരു എമെർജൻസി കിറ്റ് അടിയന്തരമായി തയ്യാറാക്കി വെക്കണമെന്നും അധികൃതർ വ്യക്‌തമാക്കി. കൂടാതെ മലയോര മേഖലകളിലേക്കുള്ള രാത്രിസഞ്ചാരം പൂർണമായി ഒഴിവാക്കണം. കാറ്റിൽ മരങ്ങൾ കടപുഴകി വീണും, പോസ്‌റ്റുകൾ തകർന്ന് വീണും അപകടങ്ങൾ ഉണ്ടാകാൻ സാധ്യതയുണ്ടെന്നും അതിനാൽ ജനങ്ങൾ ശ്രദ്ധിക്കേണ്ടതാണെന്നും അധികൃതർ കൂട്ടിച്ചേർത്തു.
Read also : കുടുംബത്തിലെ ചടങ്ങല്ല വാര്‍ത്താ സമ്മേളനം; വി മുരളീധരനെതിരെ ജോണ്‍ ബ്രിട്ടാസ്
