നമുക്ക് ഓരോരുത്തർക്കും രണ്ട് വൃക്കകൾ വീതമുണ്ട്. ഓരോന്നിനും ഏതാണ്ട് നമ്മുടെ മുഷ്‌ടിയുടെ അത്രയും വലിപ്പവും. കാഴ്‌ചയിൽ കുഞ്ഞനാണെങ്കിലും നമ്മുടെ ജീവിതത്തിന് ഏറെ നിർണായകമാണ് വൃക്കയുടെ പ്രവർത്തനം. പലപ്പോഴും നാം ഇവക്ക് വേണ്ട പരിചരണം കൊടുക്കാറില്ല. ഇതിന്റെ ഫലമായാണ് വൃക്കകൾ പല രോഗങ്ങൾക്കും കീഴടങ്ങുന്നത്. അൽപമൊന്ന് ശ്രദ്ധിച്ചാൽ രോഗം വരാതെ ഇവയെ ആരോഗ്യത്തോടെ കാത്തുസംരക്ഷിക്കാം.
രക്‌തത്തിൽ പഞ്ചസാരയുടെ അളവ് കൂടുന്നത് വൃക്കകൾക്ക് നല്ലതല്ല. കാരണം, ഈ അവസ്‌ഥയിൽ നിങ്ങളുടെ വൃക്കകൾ കൂടുതൽ കഠിനമായി പ്രവർത്തിക്കും. ഇത് ദീർഘകാല അടിസ്‌ഥാനത്തിൽ വൃക്ക തകരാറിലാകാനുള്ള സാധ്യത വർദ്ധിപ്പിക്കും. ഭൂരിഭാഗം ആളുകളിലും ഈ കാരണം കൊണ്ട് വൃക്കരോഗം ഉണ്ടാകാറുണ്ട്. അതിനാൽ, നിങ്ങളുടെ രക്‌തത്തിലെ പഞ്ചസാരയുടെ അളവ് പതിവായി പരിശോധിച്ച് അവയെ നിയന്ത്രിക്കാൻ ആവശ്യമായ എല്ലാ മുൻകരുതലുകളും സ്വീകരിക്കുക.
വൃക്ക ആരോഗ്യകരമായി നിലനിർത്തുന്നതിന് പാലിക്കേണ്ട അടിസ്‌ഥാന കാര്യങ്ങളാണ് ഒരുപാട് മരുന്നുകളും വേദനസംഹാരികളും ഒഴിവാക്കുക എന്നത്. വളരെയധികം മരുന്നുകൾ കഴിക്കുന്നത് വൃക്ക തകരാറിനും മറ്റ് വിട്ടുമാറാത്ത വൃക്ക രോഗങ്ങൾക്കും ഒരു പ്രധാന കാരണമാണ്. അതിനാൽ, സാധ്യമാകുമെങ്കിൽ, പ്രകൃതി ചികിൽസകൾ പിന്തുടരാൻ ശ്രമിക്കുക.
അമിതഭാരം നിയന്ത്രിക്കുക
അമിതഭാരം നിങ്ങളുടെ അവയവങ്ങളിൽ സമ്മർദ്ദം വർധിക്കുന്നതിനും ശരീരത്തിൽ കൂടുതൽ ദുഷിപ്പുകൾ ശേഖരിക്കപ്പെടുന്നതിനും കാരണമാകും. അതിനാൽ, നിങ്ങളുടെ ശരീരത്തിന്റെ മികച്ച പ്രവർത്തനത്തിനും ദോഷകരമായ ഏതെങ്കിലും രോഗ സാധ്യത കുറക്കുന്നതിനും അമിതഭാരം നിയന്ത്രിക്കുന്നുവെന്ന് ഉറപ്പാക്കുക.
വെള്ളം മുഖ്യം
പതിവായി വെള്ളം കുടിക്കുന്നതിലൂടെ ശരീരത്തിന് എണ്ണമറ്റ ഗുണങ്ങളാണ് ലഭിക്കുന്നത്. വൃക്കകളുടെ ആരോഗ്യത്തിന് ഒഴിവാക്കാനാകാത്ത ഒരു ഘടകമാണ് ജലം. അതിനാൽ, ദിവസവും കുറഞ്ഞത് 8-10 ഗ്‌ളാസ് വെള്ളം കുടിക്കുന്നുണ്ടെന്ന് ഉറപ്പുവരുത്തുക, കാരണം ഇത് വൃക്കയിൽ നിന്ന് ദോഷകരമായ വിഷ വസ്‌തുക്കളെ നീക്കം ചെയ്യാനും വൃക്ക സംബന്ധമായ അസുഖങ്ങൾ വരാനുള്ള സാധ്യത കുറക്കാനും സഹായിക്കുന്നു.
സിഗരറ്റും മദ്യവും ഒഴിവാക്കാം
പുകവലിയും മദ്യപാനവും ശരീരത്തിലെ വിഷ വസ്‌തുക്കളുടെ എണ്ണം വർധിപ്പിക്കുന്നതിലൂടെ നിങ്ങളുടെ വൃക്കയിൽ ഭാരം കൂടും. ഇത് വളരെ കാലം നീണ്ട് നിൽക്കുന്ന കനത്ത പ്രശ്‌നങ്ങൾ ഉണ്ടാക്കാം. അതിനാൽ, നിങ്ങളുടെ വൃക്ക വളരെക്കാലം ആരോഗ്യകരമായി തുടരുന്നുവെന്ന് ഉറപ്പാക്കുന്നതിന് നിങ്ങൾ ഈ രണ്ടു ശീലങ്ങളും ഒഴിവാക്കുന്നുവെന്ന് ഉറപ്പാക്കുക.
രക്‌ത സമ്മർദ്ദം നിയന്ത്രിക്കാം
ഉയർന്ന രക്‌തസമ്മർദ്ദം വൃക്കക്ക് ഗുരുതര പ്രശ്‌നങ്ങൾ വരുത്തിവെക്കും. ഉയർന്ന രക്‌ത സമ്മർദ്ദം നേരിടുന്നുണ്ടെങ്കിൽ ഉടൻ തന്നെ ഡോക്‌ടറെ സമീപിക്കുക.
ഭക്ഷണക്രമം
ആരോഗ്യകരമായ ഭക്ഷണക്രമം നിങ്ങളുടെ ശരീരത്തിലെ എല്ലാ അവയവങ്ങളെയും പൂർണ കാര്യക്ഷമതയിലും ഊർജ നിലയിലും പ്രവർത്തിക്കുവാൻ സഹായിക്കുന്നു. മെച്ചപ്പെട്ട വൃക്ക ആരോഗ്യത്തിനായി സോഡിയം കുറവുള്ള ഭക്ഷണമാണ് നിങ്ങൾ കഴിക്കുന്നതെന്ന് ഉറപ്പാക്കുക. മുട്ടയുടെ വെള്ള, ബ്‌ളൂ ബെറി, മൽസ്യം, ധാന്യങ്ങൾ, കോളിഫ്‌ളവർ എന്നിവയാണ് ഇതിനുള്ള മികച്ച തിരഞ്ഞെടുപ്പുകൾ.
വ്യായാമം
പതിവായി വ്യായാമം ചെയ്യുന്നത് നിങ്ങളുടെ ശരീരത്തെ ദുഷിപ്പുകളിൽ നിന്ന് വേഗത്തിൽ മുക്‌തമാക്കുവാൻ സഹായിക്കുക മാത്രമല്ല, ശരീരത്തിന്റെ മൊത്തത്തിലുള്ള പ്രവർത്തനം മെച്ചപ്പെടുത്താനും സഹായിക്കുന്നു. അതിനാൽ, ആഴ്‌ചയിൽ 5 തവണയെങ്കിലും വ്യായാമം ചെയ്യുക, ശരിയായ സ്‌ഥിരതയോടെ നിങ്ങൾ ഇത് ദീർഘകാലത്തേക്ക് പിന്തുടരുന്നുവെന്ന് ഉറപ്പാക്കുക. ആരോഗ്യകരമായ വൃക്ക നിലനിർത്തുന്നതിന് യോഗ ഒരു നല്ല വ്യായാമ മാർഗമാണ്.
ഇതിന് പുറമേ പതിവ് അടിസ്‌ഥാനത്തിൽ പൂർണ ശാരീരിക പരിശോധന നടത്തുന്നത് വളരെ പ്രധാനമാണ്. ഒരു വർഷത്തിൽ കുറഞ്ഞത് രണ്ടോ മൂന്നോ തവണയെങ്കിലും നിങ്ങൾ ചെക്കപ്പുകൾ ചെയ്യുന്നുണ്ട് എന്നത് ഉറപ്പാക്കുക.
അഭിപ്രായങ്ങളുടെ ആധികാരികത ഉറപ്പിക്കുന്നതിന് വേണ്ടി കൃത്യമായ ഇ-മെയിൽ വിലാസവും ഫോട്ടോയും ഉൾപ്പെടുത്താൻ ശ്രമിക്കുക. രേഖപ്പെടുത്തപ്പെടുന്ന അഭിപ്രായങ്ങളിൽ 'ഏറ്റവും മികച്ചതെന്ന് ഞങ്ങളുടെ എഡിറ്റോറിയൽ ബോർഡിന്' തോന്നുന്നത് പൊതു ശബ്‌ദം എന്ന കോളത്തിലും സാമൂഹിക മാദ്ധ്യമങ്ങളിലും ഉൾപ്പെടുത്തും. ആവശ്യമെങ്കിൽ എഡിറ്റ് ചെയ്യും. ശ്രദ്ധിക്കുക; മലബാർ ന്യൂസ് നടത്തുന്ന അഭിപ്രായ പ്രകടനങ്ങളല്ല ഇവിടെ പോസ്‌റ്റ് ചെയ്യുന്നത്. ഇവയുടെ പൂർണ ഉത്തരവാദിത്തം രചയിതാവിനായിരിക്കും. അധിക്ഷേപങ്ങളും അശ്‌ളീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്.
