കൊച്ചി: തിരുവനന്തപുരം സ്വര്‍ണക്കടത്ത് കേസിലെ പ്രതികളെ ആദായ നികുതി വകുപ്പും ചോദ്യം ചെയ്യും. കേന്ദ്ര ഏജന്‍സികളായ കസ്റ്റംസിനും എന്‍.ഐ.എക്കും എന്‍ഫോഴ്‌സ്‌മെന്റിനും ശേഷമാണ്, നികുതി വകുപ്പും പ്രതികളെ ചോദ്യം ചെയ്യുന്നത്. ചോദ്യം ചെയ്യുന്നതിനുള്ള അപേക്ഷ കോടതിയില്‍ സമര്‍പ്പിച്ചു. സാമ്പത്തിക കുറ്റകൃത്യങ്ങള്‍ക്കുള്ള പ്രത്യേക കോടതിയിലാണ് ആദായ നികുതി വകുപ്പ് അപേക്ഷ നല്‍കിയത്.
Read also: സംസ്ഥാനത്ത് ബാറുകള്‍ ഉടന്‍ തുറക്കില്ല; എക്‌സൈസ് കമ്മീഷണറുടെ ശുപാര്‍ശ തള്ളി
സ്വര്‍ണക്കടത്ത് കേസില്‍ പിടിയിലായ സ്വപ്‌ന സുരേഷ്, പി.എസ്. സരിത്, സന്ദീപ് നായര്‍, കെ.ടി. റമീസ്, ഹംജദ് അലി, ജലാല്‍, മുഹമ്മദ് ഷാഫി, മുഹമ്മദ് അന്‍വര്‍, ഇ. സെയ്‌തലവി തുടങ്ങിയവരെ ചോദ്യം ചെയ്യാനാണ് അപേക്ഷ സമര്‍പ്പിച്ചിരിക്കുന്നത്. നികുതിയടക്കാത്ത പണം സ്വപ്‌നയുടെ ലോക്കറില്‍ നിന്ന് കണ്ടെടുത്തിരുന്നു. പ്രതികളുടെ കയ്യില്‍ നിന്ന് ഉറവിടം വ്യക്തമാക്കാത്ത പണവും മറ്റു വിലപിടിപ്പുള്ള വസ്‌തുക്കളും കണ്ടെത്തിയതിനെ തുടര്‍ന്നാണ് അപേക്ഷ സമര്‍പ്പിച്ചത്. പ്രതികള്‍ ആദായ നികുതി വകുപ്പിന്റെ വ്യവസ്ഥകള്‍ ലംഘിച്ചുവെന്നും അപേക്ഷയില്‍ പറയുന്നു.
