കോട്ടയം: ന്യൂനപക്ഷ സ്‌കോളർഷിപ്പ് വിഷയത്തിൽ ആശങ്കക്ക് വകയില്ലെന്ന് കേരള കോൺഗ്രസ് എം ചെയ‍ർമാൻ ജോസ് കെ മാണി. ഹൈക്കോടതി വിധിയുടെ അടിസ്‌ഥാനത്തിലാണ് സർക്കാർ ന്യൂനപക്ഷ സ്‌കോളർഷിപ്പിൽ തീരുമാനമെടുത്തത്.
ന്യൂനപക്ഷ സ്‌കോളർഷിപ്പിന്റെ ആനുകൂല്യം ഇപ്പോൾ ലഭിച്ചു കൊണ്ടിരിക്കുന്നവർക്ക് ആ വിഹിതത്തിൽ കുറവുണ്ടാകില്ലെന്ന് സർക്കാർ വ്യക്‌തമാക്കിയിട്ടുണ്ട്. അതിനാൽ തന്നെ ഇക്കാര്യത്തിൽ ആശങ്കയുടെ ആവശ്യമില്ലെന്നും ജോസ് കെ മാണി പറഞ്ഞു.
പാലായിലെ തിരഞ്ഞെടുപ്പ് തോൽവിയിൽ സിപിഎം നടത്തുന്നത് സംഘടനാപരമായ അന്വേഷണമാണ്. അതിൽ അഭിപ്രായം പറയാനില്ല. സിപിഎം അടക്കമുള്ള എല്ലാ പ്രസ്‌ഥാനങ്ങളും തോറ്റാലും ജയിച്ചാലും എല്ലാ ഇടത്തും പരിശോധന നടത്താറുണ്ട്, അത് സ്വഭാവികമാണ്.
ഈ അന്വേഷണം സിപിഎമ്മിന്റെ ആഭ്യന്തരകാര്യമാണ്. അക്കാര്യത്തിൽ അഭിപ്രായം പറയുന്നതിൽ പ്രസക്‌തിയില്ല. ഞങ്ങളുടെ വിലയിരുത്തൽ പാർട്ടി തലത്തിൽ സംഘടനപരമായി നടന്ന് കൊണ്ടിരിക്കുകയാണ്; ജോസ് കെ മാണി പറഞ്ഞു.
Read Also: കേരളത്തിലെ വാരാന്ത്യ ലോക്ക്ഡൗൺ പിൻവലിച്ചേക്കും
