ഡെൽഹി: ബിജെപി ഇതര പ്രതിപക്ഷ നേതാക്കളുടെ യോഗം വിളിച്ച് ബംഗാൾ മുഖ്യമന്ത്രി മമത ബാനർജി. അന്വേഷണ ഏജൻസികളെ ദുരുപയോഗം ചെയുന്ന കേന്ദ്രത്തിനെതിരെ ഒരുമിച്ചു നിൽക്കണമെന്നും ബിജെപിക്കെതിരെ ഒറ്റക്കെട്ടായി പോരാടണമെന്നും മമത ആവശ്യപ്പെട്ടു. പ്രതിപക്ഷ നേതാക്കള്‍ക്കും വിവിധ സംസ്‌ഥാനങ്ങള്‍ക്കും വിഷയം ഉന്നയിച്ച് മമത കത്തയച്ചിട്ടുണ്ട്.
കൽക്കരി കുംഭകോണ കേസിൽ തൃണമൂൽ കോൺഗ്രസ് എംപി അഭിഷേക് ബാനർജിയെ ഇഡി വിളിപ്പിച്ചതിന് പിന്നാലെയാണ് പ്രതിപക്ഷത്തിന് മമതയുടെ കത്ത്. അധികാരത്തിലിരിക്കുന്ന സര്‍ക്കാര്‍ ഉത്തരവാദിത്തം കാണിക്കാനും എതിരഭിപ്രായങ്ങളെ അടച്ചമര്‍ത്തുന്ന നടപടികളെ എതിര്‍ക്കാനും പ്രതിപക്ഷ ഐക്യനിര വേണമെന്ന് മമത പറഞ്ഞു.
തിരഞ്ഞെടുപ്പ് അടുക്കുമ്പോൾ രാഷ്‌ട്രീയ എതിരാളികളെ അന്വേഷണ ഏജൻസികൾ ഉപയോഗിച്ച് ഇല്ലാതാക്കാൻ കേന്ദ്രം ശ്രമിക്കുന്നു. രാജ്യത്തെ പുരോഗമന ശക്‌തികൾ ഒത്തുചേർന്ന് അടിച്ചമർത്തൽ ശക്‌തിക്കെതിരെ പോരാടേണ്ടത് കാലഘട്ടത്തിന്റെ ആവശ്യമാണ്; മമത വ്യക്‌തമാക്കി.
ഇഡി, സിബിഐ, സെന്‍ട്രല്‍ വിജിലന്‍സ് കമ്മീഷന്‍, ആദായനികുതി വകുപ്പ് എന്നിവയെ രാജ്യത്തുടനീളമുള്ള പ്രതിപക്ഷ കക്ഷികളെ ലക്ഷ്യമിടാനും അപമാനിക്കാനും മാറ്റിനിര്‍ത്താനും ഉപയോഗിക്കുന്നുവെന്ന് കത്തിൽ പറയുന്നു. രാജ്യത്തിന്റെ വ്യവസ്‌ഥാപിത ജനാധിപത്യത്തിനു മേലുള്ള നേരിട്ടുള്ള ആക്രമണത്തില്‍ വലിയ ആശങ്ക അറിയിക്കാനാണ് താന്‍ കത്ത് എഴുതുന്നതെന്നും മമത കൂട്ടിച്ചേർത്തു.
അഭിപ്രായങ്ങളുടെ ആധികാരികത ഉറപ്പിക്കുന്നതിന് വേണ്ടി കൃത്യമായ ഇ-മെയിൽ വിലാസവും ഫോട്ടോയും ഉൾപ്പെടുത്താൻ ശ്രമിക്കുക. രേഖപ്പെടുത്തപ്പെടുന്ന അഭിപ്രായങ്ങളിൽ 'ഏറ്റവും മികച്ചതെന്ന് ഞങ്ങളുടെ എഡിറ്റോറിയൽ ബോർഡിന്' തോന്നുന്നത് പൊതു ശബ്‌ദം എന്ന കോളത്തിലും സാമൂഹിക മാദ്ധ്യമങ്ങളിലും ഉൾപ്പെടുത്തും. ആവശ്യമെങ്കിൽ എഡിറ്റ് ചെയ്യും. ശ്രദ്ധിക്കുക; മലബാർ ന്യൂസ് നടത്തുന്ന അഭിപ്രായ പ്രകടനങ്ങളല്ല ഇവിടെ പോസ്‌റ്റ് ചെയ്യുന്നത്. ഇവയുടെ പൂർണ ഉത്തരവാദിത്തം രചയിതാവിനായിരിക്കും. അധിക്ഷേപങ്ങളും അശ്‌ളീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്.
