തിരുവനന്തപുരം: സംസ്‌ഥാനത്ത് വിദേശ സമ്പർക്കമില്ലാത്ത 2 പേർക്ക് കൂടി ഒമൈക്രോൺ സ്‌ഥിരീകരിച്ചതോടെ സമൂഹവ്യാപന ഭീതി ഉയരുന്നു. ഇതോടെ പൊതുജനങ്ങൾ അതീവ ജാഗ്രത പാലിക്കേണ്ടത് അനിവാര്യമാണെന്ന് ആരോഗ്യവകുപ്പ് മുന്നറിയിപ്പ് നൽകിയിട്ടുണ്ട്. കൂടാതെ രാജ്യത്ത് ഒമൈക്രോൺ ബാധിതരുടെ എണ്ണം 100 കടന്ന സംസ്‌ഥാനങ്ങളുടെ പട്ടികയിൽ കേരളവും എത്തിയിട്ടുണ്ട്.
കേരളത്തിൽ ഇതുവരെ ഒമൈക്രോൺ സ്‌ഥിരീകരിച്ച ആകെ ആളുകളുടെ എണ്ണം 107 ആയി ഉയർന്നിട്ടുണ്ട്. കേരളത്തിന് പുറമേ മഹാരാഷ്‌ട്ര, ഡെൽഹി എന്നീ സംസ്‌ഥാനങ്ങളിലാണ് നിലവിൽ ഒമൈക്രോൺ ബാധിതരുടെ എണ്ണം 100 കടന്നത്. കേരളത്തിൽ ഇതുവരെ ലോ റിസ്‌ക് രാജ്യങ്ങളിൽ നിന്ന് വന്ന 52 പേർക്കും, ഹൈ റിസ്‌ക് രാജ്യങ്ങളിൽ നിന്ന് വന്ന 41 പേർക്കും, സമ്പർക്കത്തിലൂടെ 14 പേർക്കുമാണ് ഒമൈക്രോൺ ബാധിച്ചത്.
സമ്പർക്കത്തിലൂടെ സ്‌ഥിരീകരിച്ചവരിൽ 2 പേർക്കാണ് വിദേശ സമ്പർക്കം ഇല്ലാത്തത്. രോഗബാധിതർ തിരിച്ചറിയാനായി ആന്റിജൻ പരിശോധനകൾ നടത്തണമെന്നും, രോഗബാധിതർ ക്വാറന്റെയ്‌നിൽ പ്രവേശിപ്പിക്കണമെന്നും വിദഗ്‌ധർ ചൂണ്ടിക്കാട്ടുന്നു. എന്നാൽ മാത്രമേ ഒമൈക്രോൺ വ്യാപനം നിയന്ത്രിക്കാൻ കഴിയൂ എന്നാണ് വ്യക്‌തമാക്കുന്നത്‌. അതേസമയം സംസ്‌ഥാനത്ത് ഒമൈക്രോൺ സ്‌ഥിരീകരിച്ചവരിൽ ഏറെപ്പേരും ലോ റിസ്‌ക് രാജ്യങ്ങളിൽ നിന്നും എത്തിയവരാണ്.
Read also: രഞ്‌ജിത്ത് വധകേസ്; രണ്ട് പ്രതികള്‍ കൂടി കസ്‌റ്റഡിയില്‍
