എറണാകുളം: നടിയെ ആക്രമിച്ച കേസിൽ സംവിധായകൻ ബാലചന്ദ്ര കുമാറിന്റെ രഹസ്യമൊഴി രേഖപ്പെടുത്താൻ കോടതി അനുമതി നൽകി. എറണാകുളം സിജെഎം കോടതിയാണ് അനുമതി നൽകിയിരിക്കുന്നത്. രഹസ്യമൊഴി രേഖപ്പെടുത്തുന്നതിനായി മജിസ്‌ട്രേറ്റിനെ ചുമതലപ്പെടുത്തും.
കേസുമായി ബന്ധപ്പെട്ട് നടൻ ദിലീപിനെതിരെ ബാലചന്ദ്ര കുമാർ തെളിവ് പുറത്തുവിട്ട സാഹചര്യത്തിലാണ് ഇപ്പോൾ രഹസ്യമൊഴി രേഖപ്പെടുത്താൻ കോടതി അനുമതി നൽകിയത്. നടിയെ ആക്രമിച്ച കേസിലെ മുഖ്യ പ്രതി സുനിൽ കുമാറുമായി പ്രതി ദിലീപിന് ബന്ധമുണ്ടെന്നും, നടിയുടെ അപകീർത്തികരമായ ദൃശ്യങ്ങൾ ദിലീപിന്റെ കൈവശമുണ്ടെന്നുമാണ് ബാലചന്ദ്ര കുമാർ വെളിപ്പെടുത്തിയത്.
അതേസമയം കേസിൽ വിചാരണക്ക് കൂടുതൽ സമയം അനുവദിക്കണമെന്ന ആവശ്യവുമായി സർക്കാർ സുപ്രീം കോടതിയെ സമീപിച്ചു. കൂടുതൽ വെളിപ്പെടുത്തലുകൾ ഉണ്ടായ സാഹചര്യത്തിലാണ് വിചാരണ കാലാവധി 6 മാസം കൂടി നീട്ടണമെന്ന ആവശ്യം സർക്കാർ ഉന്നയിച്ചത്. നിലവിൽ ഫെബ്രുവരി 16ആം തീയതി വരെയാണ് വിചാരണ കാലാവധി.
Read also: ബിന്ദു അമ്മിണിക്ക് നേരെ ആക്രമണം; പ്രതി അറസ്‌റ്റിൽ
