തിരുവനന്തപുരം: പെട്ടിമുടിയില്‍ ഉരുള്‍പൊട്ടിയുണ്ടായ ദുരന്തത്തിന് കാരണം ഒരാഴ്‌ചയായി പെയ്‌ത അതി തീവ്രമഴയെന്ന് ജിയോളിക്കല്‍ സര്‍വ്വേ ഓഫ് ഇന്ത്യ. ദുരന്തത്തിന് ശേഷം പുറത്തുവരുന്ന ആദ്യ ആധികാരിക റിപ്പോര്‍ട്ടാണ് ജിയോളജിക്കല്‍ സര്‍വ്വേ ഓഫ് ഇന്ത്യയുടേത്. പെട്ടിമുടിയിലെ ലയങ്ങള്‍ സുരക്ഷിത സ്ഥാനത്തേക്ക് മാറ്റണമെന്നും അന്വേഷണ റിപ്പോര്‍ട്ടില്‍ വ്യക്തമാക്കി.
ജൂലൈ 30 മുതല്‍ ഓഗസ്റ്റ് 10 വരെ പെയ്‌ത കനത്ത മഴയാണ് ഉരുള്‍പൊട്ടലിന് കാരണമായതെന്ന് റിപ്പോര്‍ട്ടില്‍ പറയുന്നു. പ്രദേശത്ത് 24-26 സെന്റീ മീറ്റര്‍ മഴയാണ് പെയ്തത്. ഇതുവരെ നടത്തിയ മാപ്പിങ് പഠനങ്ങളിലെല്ലാം തന്നെ പെട്ടിമുടി അതീവ പരിസ്ഥിതി ദുര്‍ബല പ്രദേശമാണെന്നാണ് സൂചിപ്പിക്കുന്നത്. ലയങ്ങളിരിക്കുന്ന പ്രദേശം ഒരു മലയുടെ ചരിവിലാണ്. ചെറിയ മരങ്ങളും പാറക്കല്ലുകളും നിറഞ്ഞ മലയുടെ മുകള്‍ഭാഗം ഒരാഴ്ചയോളം നീണ്ടു നിന്ന കനത്ത മഴയെ തുടര്‍ന്ന് ദുര്‍ബലമായി. ഇതേ തുടര്‍ന്ന് വലിയ പാറക്കെട്ടുകള്‍ ഉള്‍പ്പെടെ താഴേക്ക് ഇടിഞ്ഞു വീഴുകയായിരുന്നു. ഇതാണ് നാടിനെ നടുക്കിയ ദുരന്തത്തിന് കാരണമായത്.
നേരത്തെ ഇതിനു സമാനമായ സംഭവങ്ങള്‍ ഒന്നും നടന്നിട്ടില്ലാത്തതിനാലാണ് തോട്ടം തൊഴിലാളികള്‍ക്ക് മുന്‍കരുതല്‍ എടുക്കാന്‍ കഴിയാതെ പോയത്. ഇത് അപകടത്തിന്റെ തീവ്രത വര്‍ധിപ്പിക്കുകയും ചെയ്‌തു. ഇപ്പോഴും ദുരന്ത സാധ്യത നില നില്‍ക്കുന്നതിനാല്‍ ഈ സ്ഥലത്ത് നിന്ന് ലയങ്ങള്‍ മാറ്റണമെന്നും പുഴയുടെ തീരത്തുള്ള നിര്‍മാണങ്ങള്‍ ഒഴിവാക്കണമെന്നും ജിയോളജിക്കല്‍ സര്‍വ്വേ അന്വേഷണ റിപ്പോര്‍ട്ടിലൂടെ നിര്‍ദ്ദേശിച്ചു.
