ന്യൂഡൽഹി: ഇന്ത്യൻ പ്രീമിയർ ലീഗിന്റെ (ഐപിഎൽ) പുതിയ പതിപ്പിന് ഒരുക്കമായി താരങ്ങൾ ടീമിനൊപ്പം ചേർന്ന് തുടങ്ങി. ഐപിഎല്ലിന് വേദിയാകുന്ന യുഎയിലേക്ക് പോകുന്നതിനു മുന്നോടിയായി ചെന്നൈ സൂപ്പർ കിങ്സ് സംഘടിപ്പിക്കുന്ന ആറ് ദിന ക്യാംപിനായി ഇന്ത്യൻ താരങ്ങൾ ചൈന്നൈയിൽ എത്തി. ചൈന്ന സൂപ്പർ കിങ്സിന്റെ ഇന്ത്യൻ താരങ്ങളായ സുരേഷ് റെയ്ന, ദീപക് ചാഹർ, പീയുഷ് ചാവ്ല, ബരീന്ദർ സ്രാൻ തുടങ്ങിയവരാണ് ഡൽഹിയിൽ നിന്നു വിമാന മാർഗം ചെന്നൈയിൽ എത്തിയത്. വിമാന ജീവനക്കാർക്ക് ഒപ്പം ഇവർ നിൽക്കുന്ന ചിത്രം സുരേഷ് റെയ്ന ഇൻസ്റ്റഗ്രാമിൽ പോസ്റ്റ് ചെയ്തിട്ടുണ്ട്.
നാളെ മുതൽ 20 വരെ ചെന്നൈയിലെ എം.എ. ചിദംബരം സ്റ്റേഡിയത്തിലാണ് ക്യാംപ് നടക്കുന്നത്. ക്യാംപിന് ശേഷം ഈ മാസം 22നു താരങ്ങൾ ചാർട്ടേഡ് വിമാനത്തിൽ യുഎയിലേക്ക് പോകും. കോവിഡ് പരിശോധനയിൽ ഫലം നെഗറ്റിവ് ആണെന്ന് സ്ഥിരീകരിച്ച ക്യാപ്റ്റൻ ധോണി റാഞ്ചിയിൽ നിന്ന് ചെന്നൈയിൽ എത്തും. വെറ്ററൻ താരം ഹർഭജൻ സിങ്ങും ക്യാംപിൽ പങ്കെടുക്കുന്നുണ്ട്. എന്നാൽ മുഖ്യ പരിശീലകൻ സ്റ്റീഫൻ ഫ്ലെമിങ്, ബാറ്റിങ് പരിശീലകൻ മൈക്ക് ഹസ്സി എന്നിവരുടെ വരവിനെ കുറിച്ച് ഇപ്പൊഴും സ്ഥിരീകരിച്ചിട്ടില്ല. ബോളിങ് പരിശീലകൻ ലക്ഷ്മീപതി ബാലാജി മാത്രമാണു ക്യാംപിനുണ്ടാകുമെന്ന് സ്ഥിരീകരിച്ചിട്ടുള്ളത്.