കാസര്കോട്: ജ്വല്ലറി നിക്ഷേപ തട്ടിപ്പ് കേസിലെ പ്രതിയായ എം.സി കമറുദ്ദീന് എം.എല്.എയുടെ വീട്ടില് പോലീസ് പരിശോധന നടത്തി. 81 ലക്ഷം രൂപയുടെ തട്ടിപ്പുമായി ബന്ധപ്പെട്ട ഏഴ് കേസുകളാണ് ചന്തേര പോലീസ് സ്റ്റേഷനില് നിലവിലുള്ളത്. ജില്ലാ ക്രൈം ബ്രാഞ്ചാണ് ഇപ്പോള് കേസ് അന്വേഷിച്ച് കൊണ്ടിരിക്കുന്നത്. സ്റ്റേറ്റ് ക്രൈം ബ്രാഞ്ചിന് കേസ് കൈമാറുന്നതിന് മുന്നോടിയായുള്ള വിവര ശേഖരണത്തിന്റെ ഭാഗമായാണ് എം.എല്.എയുടെ വീട്ടില് പരിശോധന നടത്തിയത്.
കമറുദ്ദീന്റെ പടന്നലയിലെ വീട്ടിലാണ് ചന്തേര സി ഐയുടെ നേതൃത്വത്തില് പരിശോധന നടന്നത്. ഫാഷന് ഗോള്ഡ് ഇന്റര്നാഷണലിന്റെ മാനേജര് പൂക്കോയ തങ്ങളുടെ വീട്ടിലും പരിശോധന നടക്കുന്നുണ്ട്. എന്നാല്, കമറുദ്ദീന്റെ വീട്ടില് നിന്നും കാര്യമായ തെളിവുകള് ഒന്നും ലഭിച്ചിട്ടില്ല എന്നാണ് റിപ്പോര്ട്ടുകള് സൂചിപ്പിക്കുന്നത്. എം.എല്.എക്കെതിരായുള്ള പരാതികള് കൂടി വരുന്ന സാഹചര്യത്തില് എല്ലാ പരാതികളും ഒറ്റ കേസായി പരിഗണിച്ചായിരിക്കും അന്വേഷണം നടത്തുകയെന്ന് പോലീസ് അറിയിച്ചു.