വടകര: കോഴിക്കോട് വടകരയിൽ ചുവപ്പ് മഴ. ചോറോട് ശ്രീകുറുംബ ഭഗവതി ക്ഷേത്രത്തിന് സമീപത്ത് 200 മീറ്റർ പരിധിയിലാണ് ചുവപ്പ് മഴ പെയ്‌തത്‌. സൂക്ഷ്‌മ ജീവികളുടെ സാന്നിധ്യമാണ് ഇതിന് കാരണമെന്ന് വിദഗ്‌ധർ ചൂണ്ടിക്കാട്ടുന്നു.
വടകരയിലെ തീരമേഖലയായ കുരിയാടിനു സമീപം ഇന്നലെ രാത്രി 8.30ഓടെയാണ് ചുവപ്പ് മഴ പെയ്‌തത്‌. രണ്ട് മണിക്കൂറോളം ശക്‌തമായ മഴ തുടർന്നു. മഴ വെള്ളത്തിന് ചുവപ്പ് നിറം കണ്ടതോടെ പ്രദേശവാസികളിൽ പലരും കുപ്പിയിലും ബക്കറ്റിലുമൊക്കെ വെള്ളം ശേഖരിച്ചു.
പ്രദേശത്ത് മുൻപും ഇതുപോലെ ചുവപ്പ് നിറത്തിൽ മഴ പെയ്‌തിരുന്നു. കിണറുകളിലടക്കം വെള്ളം കലർന്നതിനാൽ നാട്ടുകാർ ആശങ്ക പ്രകടിപ്പിക്കുന്നുണ്ട്. എന്നാൽ, ആശങ്കപ്പെടേണ്ട സാഹചര്യമില്ലെന്നാണ് സിഡബ്‌ള്യൂആർഡിഎമ്മിലെ (സെന്റർ ഫോർ വാട്ടർ റിസോഴ്‌സസ് ഡെവലപ്‌മെന്റ് ആൻഡ് മാനേജ്‌മെന്റ്‌) വിദഗ്‌ധർ അറിയിച്ചിരിക്കുന്നത്. മഴവെള്ളം പരിശോധിക്കുമെന്നും സിഡബ്‌ള്യൂആർഡിഎം അധികൃതർ വ്യക്‌തമാക്കിയിട്ടുണ്ട്.
Also Read: സംസ്‌ഥാനത്ത് 3 പേർക്ക് കൂടി സിക; നിലവിൽ ചികിൽസയിലുള്ളത് 6 പേർ
