മലപ്പുറം: തവനൂരിലെ യുഡിഎഫ് സ്‌ഥാനാർഥി ഫിറോസ് കുന്നംപറമ്പിലിന് എതിരെ മന്ത്രി കെടി ജലീൽ നടത്തിയ പരാമർശം വംശീയ അധിക്ഷേപമാണന്ന് ചൂണ്ടിക്കാട്ടി പരാതി. യൂത്ത് കോൺഗ്രസ് സംസ്‌ഥാന സെക്രട്ടറി ഇപി രാജീവാണ് പരാതി നൽകിയത്.
സ്വകാര്യ ചാനലിന് നൽകിയ അഭിമുഖത്തിൽ ആണ് ഫിറോസിന് എതിരെ കെടി ജലീൽ വിവാദ പരാമർശം നടത്തിയത്. ലീഗ് പ്രവർത്തകനെ കോൺഗ്രസിന്റെ വേഷം കെട്ടിച്ച സങ്കരയിനമാണ് തന്റെ എതിർ സ്‌ഥാനാർഥി എന്നായിരുന്നു ജലീലിന്റെ പരാമർശം. ഇതിന് എതിരെയാണ് ഇപി രാജീവ് തിരഞ്ഞെടുപ്പ് കമ്മീഷനും ഡിജിപിക്കും പരാതി നൽകിയത്.
ഫിറോസ് കുന്നംപറമ്പിലിന്റെ പേരെടുത്ത് പറയാതെയാണ് ജലീൽ വിമർശനം ഉന്നയിച്ചത്. അദ്ദേഹം യൂത്ത് ലീഗുകാരനാണെന്നും ഒരു സങ്കരയിനം സ്‌ഥാനാർഥിയെ നിർത്തി തന്നെ തോൽപ്പിക്കാൻ പറ്റുമോയെന്ന അവസാന ശ്രമമാണ് യുഡിഎഫ് നടത്തുന്നതെന്നും ജലീൽ പറഞ്ഞിരുന്നു.
മന്ത്രി നടത്തിയത് തിരഞ്ഞെടുപ്പ് ചട്ടങ്ങൾക്ക് വിരുദ്ധമായ വംശീയ അധിക്ഷേപമാണന്ന് പറയുന്ന പരാതിയിൽ സമൂഹത്തിൽ ചേരിതിരിവ് സൃഷ്‌ടിക്കാനുള്ള ശ്രമത്തിനെതിരെ നടപടി എടുക്കണമെന്നും ആവശ്യപ്പെടുന്നു.
കഴിഞ്ഞ രണ്ട് തവണയും കെടി ജലീൽ വിജയിച്ചു കയറിയ തവനൂരിൽ ഫിറോസ് കുന്നംപറമ്പിൽ കൂടി പ്രചാരണം ആരംഭിച്ചതോടെ മണ്ഡലത്തിൽ തിരഞ്ഞെടുപ്പ് ചൂടേറിയിരിക്കുകയാണ്. 2011ല്‍ 6854ഉം 2016ല്‍ 17064ഉം ആയിരുന്നു ജലീലിന്റെ ഭൂരിപക്ഷം. ഫിറോസിനെ ഒരു എതിരാളിയായി കാണുന്നില്ലെന്ന് ജലീൽ നേരത്തെ പറഞ്ഞിരുന്നു.
അഭിപ്രായങ്ങളുടെ ആധികാരികത ഉറപ്പിക്കുന്നതിന് വേണ്ടി കൃത്യമായ ഇ-മെയിൽ വിലാസവും ഫോട്ടോയും ഉൾപ്പെടുത്താൻ ശ്രമിക്കുക. രേഖപ്പെടുത്തപ്പെടുന്ന അഭിപ്രായങ്ങളിൽ 'ഏറ്റവും മികച്ചതെന്ന് ഞങ്ങളുടെ എഡിറ്റോറിയൽ ബോർഡിന്' തോന്നുന്നത് പൊതു ശബ്‌ദം എന്ന കോളത്തിലും സാമൂഹിക മാദ്ധ്യമങ്ങളിലും ഉൾപ്പെടുത്തും. ആവശ്യമെങ്കിൽ എഡിറ്റ് ചെയ്യും. ശ്രദ്ധിക്കുക; മലബാർ ന്യൂസ് നടത്തുന്ന അഭിപ്രായ പ്രകടനങ്ങളല്ല ഇവിടെ പോസ്‌റ്റ് ചെയ്യുന്നത്. ഇവയുടെ പൂർണ ഉത്തരവാദിത്തം രചയിതാവിനായിരിക്കും. അധിക്ഷേപങ്ങളും അശ്‌ളീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്.
