റിയാദ്: സൗദി അറേബ്യയിൽ ഇന്ന് 1148 പേർക്ക് രോഗമുക്തി. 1069 പേർക്ക് പുതുതായി രോഗം സ്ഥിരീകരിച്ചു. അതേസമയം, 28 മരണമാണ് ഇന്ന് റിപ്പോർട്ട് ചെയ്തത്. റിയാദ് -12, ജിദ്ദ- 3, മക്ക – 5, മദീന – 1, ഹുഫൂഫ് – 2, ഖത്വീഫ് - 1, മുബറസ് - 2, ദഹ്റാൻ – 1, ജീസാൻ – 1 എന്നിവിടങ്ങളിലാണ് മരണം സംഭവിച്ചത്. ഇതോടെ ആകെ മരണം 3813 ആയി ഉയർന്നു.
രാജ്യത്ത് ഇതുവരെ ആകെ റിപ്പോർട്ട് ചെയ്ത കോവിഡ് കേസുകളുടെ എണ്ണം 312924 ആയി. ഇതിൽ 287403 പേരും രോഗമുക്തി നേടി. ഇതോടെ രാജ്യത്തെ ആകെ രോഗമുക്തി നിരക്ക് 91.8 ശതമാനമായി ഉയർന്നു. നിലവിൽ 21708 പേരാണ് ചികിത്സയിലുള്ളത്. ഇതിൽ 1576 പേരുടെ ആരോഗ്യ സ്ഥിതി മാത്രമാണ് ആശങ്കയുണ്ടാക്കുന്നത്. ഇവർ തീവ്രപരിചരണ വിഭാഗത്തിലാണ്. ബാക്കിയുള്ളവരുടെ ആരോഗ്യനില തൃപ്തികരമാണെന്നാണ് റിപ്പോർട്ട്.
മദീനയിലും റിയാദിലുമാണ് കഴിഞ്ഞ 24 മണിക്കൂറിനിടെ ഏറ്റവും കൂടുതൽ പുതിയ കേസുകൾ റിപ്പോർട്ട് ചെയ്തത്. രണ്ടിടത്തും 61 പുതിയ കേസുകളാണ് റിപ്പോർട്ട് ചെയ്തത്. ജീസാനിൽ 59ഉം ഹാഇലിൽ 48ഉം ജിദ്ദയിൽ 43ഉം മക്കയിൽ 43ഉം ദഹ്റാനിൽ 36ഉം ബുറൈദയിൽ 32ഉം പുതിയ കേസുകൾ റിപ്പോർട്ട് ചെയ്തു. വെള്ളിയാഴ്ച രാജ്യത്ത് 60,195 കോവിഡ് ടെസ്റ്റുകൾ നടന്നു. ഇതുവരെ നടന്ന മൊത്തം ടെസ്റ്റുകളുടെ എണ്ണം 4,974,119 ആയി.