കോഴിക്കോട്: ജില്ലയിലെ മേപ്പയൂരിലുള്ള അരിക്കുളം മുക്കിലും പരിസര പ്രദേശങ്ങളിലും തെരുവ് നായ ശല്യം രൂക്ഷമാകുന്നു. ഇരുചക്ര വാഹനങ്ങളിൽ സഞ്ചരിക്കുന്ന ആളുകൾക്ക് പുറകെ ഓടി അപകടങ്ങൾ ഉണ്ടാകുന്നതും, കാൽനട യാത്രക്കാരെ ആക്രമിക്കുന്നതും നിലവിൽ പതിവ് കാഴ്‌ചയാകുകയാണ്.
അടുത്തിടെയാണ് പ്രദേശത്ത് തെരുവ് നായകൾ ചേർന്ന് തൊഴിലുറപ്പ് തൊഴിലാളികളെ ആക്രമിച്ചത്. കൂടാതെ അരിക്കുളം യുപി സ്‌കൂൾ, എൽപി സ്‌കൂൾ എന്നിവയുടെ പരിസരങ്ങളിൽ തെരുവ് നായകൾ വർധിക്കുന്നത് രക്ഷിതാക്കൾക്കും, വിദ്യാർഥികൾക്കും ആശങ്ക സൃഷ്‌ടിക്കുന്നുണ്ട്. നവംബർ ഒന്നാം തീയതി മുതൽ സ്‌കൂളുകൾ തുറക്കുമ്പോൾ സ്‌കൂൾ പരിസരത്തെ നായശല്യം വിദ്യാർഥികൾക്ക് വെല്ലുവിളി ഉണ്ടാക്കും.
കൂടാതെ രാത്രി വൈകി യാത്ര ചെയ്യുന്ന ആളുകളെയും, രാവിലെ നടക്കാൻ ഇറങ്ങുന്ന ആളുകളെയും നായകൾ ആക്രമിക്കുന്നത് നിത്യകാഴ്‌ചയാകുകയാണ്. ഈ സാഹചര്യത്തിൽ തെരുവ് നായകളുടെ ശല്യത്തിന് അടിയന്തിര പരിഹാരം കാണണമെന്ന ആവശ്യവുമായി നാട്ടുകാർ അധികൃതരെ സമീപിച്ചിട്ടുണ്ട്.
Read also: ഇനി മലക്കപ്പാറയിലേക്ക്; ആദ്യ സർവീസ് നാളെ ആരംഭിക്കും
