മലപ്പുറം: നിരവധി കേസുകളിൽ പ്രതികളായ യുവാക്കൾക്ക് മലപ്പുറം ജില്ലയിൽ പ്രവേശന വിലക്ക് ഏർപ്പെടുത്തി. അങ്ങാടിപ്പുറം വലമ്പൂർ പണിക്കർകുന്നിൽ വീട്ടിൽ മുഹമ്മദ് ആദിൽ (25), കാളികാവ് പോലീസ് സ്‌റ്റേഷൻ പരിധിയിലെ ചെങ്കോട് സ്വദേശി സുഫൈൽ (30) എന്നിവർക്കാണ് പ്രവേശന വിലക്ക് ഏർപ്പെടുത്തിയത്. സാമൂഹിക പ്രവർത്തനങ്ങൾ തടയൽ നിയമ (കാപ്പ) പ്രകാരമാണ് ഇവർക്കെതിരെ നടപടി സ്വീകരിച്ചത്.
ജില്ലാ പോലീസ് മേധാവിയുടെ പ്രത്യേക റിപ്പോർട്ടിന്റെ അടിസ്‌ഥാനത്തിലാണ്‌ നടപടി. ഒരു വർഷത്തേക്കാണ് യുവാക്കൾക്ക് വിലക്ക് ഉള്ളത്. തൃശൂർ മേഖലാ ഡിഐജിയാണ് വിലക്ക് ഏർപ്പെടുത്തിയ ഉത്തരവിട്ടത്. ആദിലിനെതിരെ പെരിന്തൽമണ്ണ, മങ്കട പോലീസ് സ്‌റ്റേഷൻ പരിധികളിൽ നിരവധി കേസുകൾ രജിസ്‌റ്റർ ചെയ്‌തിട്ടുള്ളതായി കണ്ടെത്തിയതായി പോലീസ് പറഞ്ഞു.
യുവാക്കൾക്ക് ഇനി ജില്ലയിൽ പ്രവേശിക്കണമെങ്കിൽ ജില്ലാ പോലീസ് മേധാവിയുടെ മുൻ‌കൂർ അനുമതി വേണം. അതേസമയം, ജില്ലയിൽ സ്‌ഥിരമായി കുറ്റകൃത്യങ്ങളിൽ ഏർപ്പെടുന്നവരെ നിരീക്ഷിച്ച് വരികയാണെന്നും കൂടുതൽ പേർക്കെതിരെ പ്രവേശന വിലക്ക് ഏർപ്പെടുത്തുമെന്നും ജില്ലാ പോലീസ് മേധാവി അറിയിച്ചു.
Most Read: പുരാവസ്‌തു തട്ടിപ്പ്: സിബിഐ അന്വേഷണം വേണം; വിഎം സുധീരൻ
