തിരുവനന്തപുരം: നിയമസഭയ്‌ക്ക് പുറത്ത് രാഷ്‌ട്രീയ വിഷയങ്ങളില്‍ അഭിപ്രായം പറയുമെന്ന സ്‌പീക്കര്‍ എംബി രാജേഷിന്റെ പ്രസ്‌താവനയില്‍ അതൃപ്‌തി പ്രകടിപ്പിച്ച് പ്രതിപക്ഷം. സഭയ്‌ക്ക് പുറത്ത് രാഷ്‌ട്രീയം പറയുമെന്ന രാജേഷിന്റെ പ്രസ്‌താവന വേദനപ്പിച്ചുവെന്ന് പ്രതിപക്ഷ നേതാവ് വിഡി സതീശന്‍ പറഞ്ഞു.
സഭയ്‌ക്ക് അകത്തും പുറത്തും സ്‌പീക്കര്‍ രാഷ്‌ട്രീയം പറയരുതെന്നാണ് കീഴ്‌വഴക്കമെന്ന് ചൂണ്ടിക്കാട്ടിയ വിഡി സതീശൻ സ്‌പീക്കര്‍ സഭയ്‌ക്ക് പുറത്ത് രാഷ്‌ട്രീയം പറഞ്ഞാല്‍ പ്രതിപക്ഷത്തിന് മറുപടി പറയേണ്ടി വരുമെന്നും പ്രതികരിച്ചു. കൂടാതെ വിഎസ് അച്യുതാനന്ദന്‍ മന്ത്രിസഭയില്‍ സ്‌പീക്കറായിരുന്ന കെ രാധാകൃഷ്‌ണനെ മാതൃകയാക്കണമെന്നും പ്രതിപക്ഷ നേതാവ് കൂട്ടിച്ചേര്‍ത്തു.
ഒരു ചാനലിന് നല്‍കിയ അഭിമുഖത്തിലാണ് സഭയ്‌ക്ക് പുറത്ത് രാഷ്‌ട്രീയ വിഷയങ്ങളില്‍ അഭിപ്രായം പറയുമെന്ന് എംബി രാജേഷ് നിലപാട് വ്യക്‌തമാക്കിയത്. സ്‌പീക്കര്‍ പദത്തിന്റെ അര്‍ഥം അഭിപ്രായമില്ലാത്തയാള്‍ എന്നല്ലെന്നും അദ്ദേഹം പറഞ്ഞു.
അല്‍പ്പം മുൻപാണ് 15ആം നിയമസഭയുടെ സ്‌പീക്കറായി എംബി രാജേഷിനെ തിരഞ്ഞെടുത്തത്. 136 അംഗങ്ങൾ വോട്ട് രേഖപ്പെടുത്തിയതിൽ എംബി രാജേഷിന് 96 വോട്ട് ലഭിച്ചു. യുഡിഎഫില്‍ നിന്ന്‌ മൽസരിച്ച പിസി വിഷ്‌ണുനാഥിന് 40 വോട്ടും ലഭിച്ചു. തൃത്താലയില്‍ നിന്നും യുഡിഎഫ് സ്‌ഥാനാര്‍ഥി വിടി ബല്‍റാമിനെ പരാജയപ്പെടുത്തിയാണ് എംബി രാജേഷ് സഭയിലെത്തിയത്.
അഭിപ്രായങ്ങളുടെ ആധികാരികത ഉറപ്പിക്കുന്നതിന് വേണ്ടി കൃത്യമായ ഇ-മെയിൽ വിലാസവും ഫോട്ടോയും ഉൾപ്പെടുത്താൻ ശ്രമിക്കുക. രേഖപ്പെടുത്തപ്പെടുന്ന അഭിപ്രായങ്ങളിൽ 'ഏറ്റവും മികച്ചതെന്ന് ഞങ്ങളുടെ എഡിറ്റോറിയൽ ബോർഡിന്' തോന്നുന്നത് പൊതു ശബ്‌ദം എന്ന കോളത്തിലും സാമൂഹിക മാദ്ധ്യമങ്ങളിലും ഉൾപ്പെടുത്തും. ആവശ്യമെങ്കിൽ എഡിറ്റ് ചെയ്യും. ശ്രദ്ധിക്കുക; മലബാർ ന്യൂസ് നടത്തുന്ന അഭിപ്രായ പ്രകടനങ്ങളല്ല ഇവിടെ പോസ്‌റ്റ് ചെയ്യുന്നത്. ഇവയുടെ പൂർണ ഉത്തരവാദിത്തം രചയിതാവിനായിരിക്കും. അധിക്ഷേപങ്ങളും അശ്‌ളീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്.
