ഷാർജ: സർക്കാർ ജീവനക്കാരായ അമ്മമാർക്ക് വ്യവസ്‌ഥകളോടെ വർക്ക് ഫ്രം ഹോമിന് അനുമതി നൽകി ഷാർജ. 6ആം ക്‌ളാസ് വരെയുള്ള കുട്ടികൾ വീട്ടിൽ ഓൺലൈൻ പഠനത്തിലാണെങ്കിൽ സർക്കാർ ജീവനക്കാരായ അമ്മമാർക്ക് അവരെ സഹായിക്കുന്നതിനായി വർക്ക് ഫ്രം ഹോമിന് അനുമതി നൽകും. ഡയറക്‌ടറേറ്റ് ഓഫ് ഹ്യുമൻ റിസോഴ്‌സസാണ് സർക്കാർ സ്‌ഥാപനങ്ങൾക്ക്‌ നിർദ്ദേശം നൽകിയിരിക്കുന്നത്.
2022 ജനുവരി 3 മുതൽ ആരംഭിച്ച അധ്യയന വർഷത്തിന്റെ രണ്ടാം ഘട്ടം മുതൽ ഇപ്രകാരം വർക്ക് ഫ്രം ഹോമിന് അനുമതി നൽകാൻ നിർദ്ദേശം നൽകിയിട്ടുണ്ട്. കൂടാതെ വിദൂരമായി ജോലി ചെയ്യാൻ കഴിയുന്ന തസ്‌തികകളിൽ ഉള്ളവർക്കാണ് ഈ അനുമതി നൽകുന്നത്.
വിദൂര വിദ്യാഭ്യാസ ദിവസങ്ങളിൽ മാത്രമായിരിക്കണം വർക്ക് ഫ്രം ഹോം അനുവദിക്കേണ്ടതെന്നും നിർദ്ദേശത്തിൽ വ്യക്‌തമാക്കുന്നുണ്ട്. അംഗീകൃത അക്കാദമിക് പട്ടിക പ്രകാരവും കുട്ടിയെ സഹായിക്കാൻ ആരും ഇല്ലാത്ത പ്രത്യേക സാഹചര്യവും പരിഗണിച്ചാണ് അമ്മമാർക്ക് നിശ്‌ചിത ദിവസങ്ങളിൽ വർക്ക് ഫ്രം ഹോമിന് അനുമതി നൽകുന്നത്.
Read also: സംസ്‌ഥാന ചലച്ചിത്ര അക്കാദമി ചെയർമാനായി രഞ്‌ജിത്ത് ചുമതലയേറ്റു
