തിരുവനന്തപുരം : സംസ്ഥാനത്ത് ബുധനാഴ്ച സ്വർണവിലയിൽ 200 രൂപയുടെ കുറവ്. ഇതോടെ സംസ്ഥാനത്ത് നിലവിൽ പവന് 35,000 രൂപയായി സ്വർണവില ഇടിഞ്ഞു. 4,375 രൂപയാണ് നിലവിൽ ഗ്രാമിന് വില. ഇതോടെ ഈ ഒരു മാസത്തിനിടെ സംസ്ഥാനത്ത് സ്വർണവിലയിൽ ഉണ്ടായ ഇടിവ് 2000 രൂപയായി.
കഴിഞ്ഞ നാല് വർഷത്തിനിടെ ആഗോള വിപണിയിൽ സ്വർണവില നേരിട്ട ഏറ്റവും വലിയ പ്രതിമാസ ഇടിവാണ് ഇത്. ആഗോള വിപണിയിൽ ഒരു ട്രോയ് ഔൺസിന്റെ വില 1,763.63 ഡോളറായാണ് കുറഞ്ഞത്. അതായത് ഈ മാസം മാത്രം 7.5 ശതമാനത്തിന്റെ കുറവാണ് ഉണ്ടായിട്ടുള്ളത്.
പലിശ വർധന വേണ്ടിവന്നേക്കുമെന്ന യുഎസ് ഫെഡ് റിസർവിന്റെ അറിയിപ്പാണ് സ്വർണവിപണിയെ ബാധിച്ചത്. കൂടാതെ ഡോളർ നേട്ടമുണ്ടാക്കുകയും ചെയ്തോടെ സ്വർണവിലയിൽ ഇടിവ് രൂക്ഷമായി. നിലവിൽ രാജ്യത്തെ കമ്മോഡിറ്റി വിപണിയായ എംസിഎക്സിൽ 3 മാസത്തെ താഴ്ന്ന നിലവാരത്തിലാണ് ഇപ്പോൾ സ്വർണവില.
Read also : ആൽഫ, ഡെൽറ്റ വകഭേദങ്ങൾക്ക് എതിരെ കോവാക്സിൻ ഫലപ്രദം; യുഎസ്