കണ്ണൂർ: തലശ്ശേരി ജില്ലാ കോടതി ബോംബിട്ട് തകർക്കുമെന്ന് ഭീഷണി. ചീഫ് ജുഡീഷ്യൽ മജിസ്ട്രേറ്റ് കോടതിക്ക് പുറത്തെ ചുമരിലാണ് ഇന്നലെ വൈകിട്ട് പോസ്റ്റർ പ്രത്യക്ഷപ്പെട്ടത്. കോടതി ബോംബിട്ട് തകർക്കുമെന്നും വനിതാ വക്കീലിന്റെ തലതെറിപ്പിക്കുമെന്നാണ് പോസ്റ്ററിലൂടെ ഭീഷണി മുഴക്കിയത്.
ഫാമിലി കൗൺസിലിനിടയിൽ മര്യാദയില്ലാതെ ആണുങ്ങളോട് മെക്കിട്ട് കേറുന്ന വനിതാ വക്കീലിന്റെ തല തെറിപ്പിക്കുമെന്നാണ് പോസ്റ്ററിലെ വരികളുടെ തുടക്കം. ചീഫ് ജുഡീഷ്യൽ മജിസ്ട്രേറ്റ് കോടതിക്ക് പുറത്ത് ശൗചാലയ ഭാഗത്തെ ചുമരിലാണ് കടലാസിൽ എഴുതിയ പോസ്റ്റർ പതിച്ചിട്ടുള്ളത്. തലശ്ശേരി പോലീസും രഹസ്യാന്വേഷണ വിഭാഗവും സ്ഥലത്തെത്തി പരിശോധന നടത്തി. പോസ്റ്ററിൽ എഴുതിയ വരികളിൽ കോടതിയെയും ഭരണകൂടത്തെയും വക്കീലിനെയും അസഭ്യമായാണ് വിമർശിക്കുന്നത്.
കുടുംബ കോടതിയിലെ ഒരു വ്യവഹാരവുമായി ബന്ധപ്പെട്ട് കക്ഷിയും അഭിഭാഷകനുമായ തർക്കം ഉണ്ടായിരുന്നു. ഇതാകാം ഭീഷണിക്ക് പിറകിലെന്നാണ് പോലീസ് സംശയിക്കുന്നത്. പോരാട്ടം എന്ന പേരിലാണ് പോസ്റ്ററിലെ വരികൾ അവസാനിക്കുന്നത്. എന്നാൽ, മാവോയിസ്റ്റ് സംഘടനകളുമായി പോസ്റ്ററിന് ബന്ധമുണ്ടെന്ന സൂചനകൾ ഒന്നും കണ്ടെത്താനായിട്ടില്ല. കോടതി അധികൃതരുടെ പരാതിയെ തുടർന്ന് തലശ്ശേരി പോലീസ് അന്വേഷണം തുടങ്ങി.
Most Read: റഷ്യൻ സ്വകാര്യ വിമാനങ്ങൾക്ക് വിലക്ക് ഏർപ്പെടുത്തി ബ്രിട്ടൺ
