കേരളത്തിന് പുതിയ മാദ്ധ്യമം ‘ജോയിൻ ദ സ്റ്റോറി’; എംപി ബഷീറും രാജീവ് ശങ്കരനും ഒന്നിക്കുന്നു
മീഡിയ ടെക്നോളജി മേഖലകളിൽ സംരംഭകരായ അലൻ ജോണും കിരൺ ജെയിംസും സ്ഥാപക ഡയറക്ടർമാരായ 'ജോയിൻ ദ സ്റ്റോറി' യുടെ ഔപചാരിക പ്രഖ്യാപനവും ലോഗോ പ്രകാശനവും കഴിഞ്ഞ ദിവസം കൊച്ചിയിൽ നടന്നു.
കൊച്ചി: മുതിർന്ന മാദ്ധ്യമ പ്രവർത്തകരായ എംപി ബഷീറും രാജീവ് ശങ്കരനും എഡിറ്റോറിയൽ നേതൃത്വം നൽകുന്ന പുതിയ മാദ്ധ്യമ സംരംഭം ‘ജോയിൻ ദ സ്റ്റോറി’ ജനുവരി ആദ്യവാരത്തിൽ പ്രവർത്തനം തുടങ്ങും.
മലയാളത്തിലെ ആദ്യ വാർത്താ ചാനലായിരുന്ന ഇന്ത്യാവിഷന്റെ മുന് എക്സിക്യൂട്ടീവ് എഡിറ്ററായ എംപി ബഷീര്,റിപ്പോർട്ടർ ലൈവ്, ന്യൂസ് മലയാളം എന്നീ ചാനലുകളുടെ എഡിറ്റോറിയൽ മേധാവിയായിരുന്നു. മീഡിയവണ് ചാനല് മുന് കോഓര്ഡിനേറ്റിംഗ് എഡിറ്ററാണ് രാജീവ് ശങ്കരന്.
മാദ്ധ്യമവിമർശകനും മുൻ ലോക്സഭാംഗവും നിയമസഭാംഗവും മുൻ പ്രസ് കൗൺസിൽ അംഗവുമായ ഡോക്ടർ സെബാസ്റ്റ്യൻ പോളാണ് കൊച്ചിയിൽ ലോഗോ പ്രകാശനം നിർവഹിച്ചത്. വിശ്വാസ്യതക്ക് പരമപ്രാധാന്യം നൽകുന്നതും എഐ-ഡിജിറ്റല് സാങ്കേതിക വിദ്യകളെ പരമാവധി ഉപയോഗപ്പെടുത്തുകയും ചെയ്യുന്ന രീതിയിലാണ് പുതിയ സംരംഭമെന്നും ഫൗണ്ടിങ് എഡിറ്റർമാരായി ചുമതലയേറ്റ എംപി ബഷീറും രാജീവ് ശങ്കരനും പറഞ്ഞു.
ഓരോ ദിവസത്തെയും പ്രധാന വാര്ത്തകളെ വസ്തുതാപരമായി വിശകലനം ചെയ്യുന്ന ഡിബേറ്റുകൾ, വാർത്താ എക്സ്പ്ളെയിനറുകള്, ആഴത്തില് വാസ്തവം തേടുന്ന അഭിമുഖങ്ങള്, സമൂഹത്തിന്റെ വിവിധ തലങ്ങളിലേക്ക് ഇറങ്ങിച്ചെല്ലുന്ന അന്വേഷണാത്മക റിപ്പോര്ട്ടുകള്, വിവിധ മേഖലകളിലെ വിദഗ്ധരുടെ അഭിപ്രായങ്ങള് ഉൾകൊള്ളുന്ന വീഡിയോ കോളങ്ങൾ എന്നിവയാവും ‘ജോയിന് ദ സ്റ്റോറി’യുടെ അടിസ്ഥാന ഉള്ളടക്കമെന്ന് ജോയിൻ ദി സ്റ്റോറി പ്രൈവറ്റ് ലിമിറ്റഡ് ഭാരവാഹികൾ വാർത്താ സമ്മേളനത്തിൽ പറഞ്ഞു.
‘ജോയിൻ ദ സ്റ്റോറി’ യുടെ ഔപചാരിക പ്രഖ്യാപന വാർത്താ സമ്മേളനത്തിൽ സംസാരിക്കുന്ന ഭാരവാഹികൾ
“യൂട്യൂബ് ചാനലുകള്, മലയാളത്തിലും ഇംഗ്ളീഷിലുമുള്ള പോര്ട്ടലുകള്, നൂതനമായ സാങ്കേതികതയും ഉള്ളടക്കവും ഉറപ്പാക്കുന്ന ടെലിവിഷൻ ചാനൽ എന്നിവയാവും പ്രധാന പ്ളാറ്റ്ഫോമുകൾ. റിപ്പോര്ട്ടര്മാര്, ക്രിയേറ്റർമാർ, ജേണലിസത്തോട് താല്പ്പര്യമുള്ള പൊതുജനങ്ങള് എന്നിവരുടെ ഒത്തുചേരലാവും ‘ജോയിന് ദ സ്റ്റോറി’യില് ഉണ്ടാവുക. സ്വതന്ത്ര മാദ്ധ്യമ പ്രവര്ത്തനത്തെ വാണിജ്യപരമായി ലാഭകരമാക്കുക എന്ന ദീര്ഘകാല ലക്ഷ്യവും ഈ സംരംഭത്തിനുണ്ട്.” -ഭാരവാഹികൾ പറഞ്ഞു.
“തുടക്കത്തിൽ മലയാളത്തിലും പിന്നീട് ഇംഗ്ളീഷിലുമുള്ള പ്ളാറ്റ്ഫോമുകൾ നിലവില്വരും. കേരളത്തിലെ ഏറ്റവും വിശ്വാസ്യതയുള്ള വാർത്താ സ്റ്റോറികള് ജനങ്ങളിലേക്കെത്തിക്കുന്ന മാദ്ധ്യമസ്ഥാപനമാകുക എന്ന ലക്ഷ്യത്തിനാവും ‘ജോയിന് ദ സ്റ്റോറി’ പ്രാധാന്യം നല്കുക” -ഭാരവാഹികൾ വിശദീകരിച്ചു.
ഡോക്ടർ സെബാസ്റ്റ്യൻ പോൾ ലോഗോ പ്രകാശനം നിർവഹിക്കുന്നു. ഒപ്പം ജോയിൻ ദി സ്റ്റോറി പ്രൈവറ്റ് ലിമിറ്റഡ് ഭാരവാഹികളും.
“കേവലം മറ്റൊരു ന്യൂസ്റൂം സൃഷ്ട്ടിക്കുകയല്ല ഞങ്ങളുടെ ലക്ഷ്യം. സാങ്കേതികവിദ്യ ഗുണപരമായി പ്രയോജനപ്പെടുത്തുന്നതും വാർത്തയിലെ സത്യനിഷ്ഠയെ ശക്തിപ്പെടുത്തുന്നതും, ഓരോ സ്റ്റോറിയും പൊതുജന അവബോധത്തെ ഉയര്ത്തുന്നതുമായ ഒരു മാദ്ധ്യമ സ്ഥാപനം നിര്മിക്കുകയാണ് ലക്ഷ്യം,” ജോയിന് ദ സ്റ്റോറി സ്ഥാപക ഡയറക്ടറായ അലന് ജോണ് പറഞ്ഞു.
‘ജോയിന് ദ സ്റ്റോറി’ ലോഗോ
“കാര്യങ്ങള് ആഴത്തില് വിവരിച്ചുതരുന്നതിന് പകരം ആര്ത്തട്ടഹസിക്കുന്ന വാര്ത്താ ശൈലിയോട് ആഗോളതലത്തില് മടുപ്പ് ദൃശ്യമാണ്. ഈ ശൈലിയെ മാറ്റിമറിക്കാനാണ് ഞങ്ങളുടെ മാദ്ധ്യമ സംരംഭം ശ്രമിക്കുക,” മറ്റൊരു സ്ഥാപക ഡയറക്ടറായ കിരണ് ജയിംസ് പറഞ്ഞു
അഭിപ്രായങ്ങളുടെ ആധികാരികത ഉറപ്പിക്കുന്നതിന് വേണ്ടി കൃത്യമായ ഇ-മെയിൽ വിലാസവും ഫോട്ടോയും ഉൾപ്പെടുത്താൻ ശ്രമിക്കുക. രേഖപ്പെടുത്തപ്പെടുന്ന അഭിപ്രായങ്ങളിൽ 'ഏറ്റവും മികച്ചതെന്ന് ഞങ്ങളുടെ എഡിറ്റോറിയൽ ബോർഡിന്' തോന്നുന്നത് പൊതു ശബ്ദം എന്ന കോളത്തിലും സാമൂഹിക മാദ്ധ്യമങ്ങളിലും ഉൾപ്പെടുത്തും. ആവശ്യമെങ്കിൽ എഡിറ്റ് ചെയ്യും. ശ്രദ്ധിക്കുക; മലബാർ ന്യൂസ് നടത്തുന്ന അഭിപ്രായ പ്രകടനങ്ങളല്ല ഇവിടെ പോസ്റ്റ് ചെയ്യുന്നത്. ഇവയുടെ പൂർണ ഉത്തരവാദിത്തം രചയിതാവിനായിരിക്കും. അധിക്ഷേപങ്ങളും അശ്ളീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്.
