ചീഫ് ജസ്‌റ്റിനെതിരെ അപകീർത്തികരമായ പോസ്‌റ്റ്; കെപിസിസി ഭാരവാഹികൾക്ക് നോട്ടീസ്
ഒക്‌ടോബർ 12നാണ് കെപിസിസിയുടെ ഔദ്യോഗിക എക്‌സ് ഹാൻഡിലിൽ ചീഫ് ജസ്‌റ്റിസിനെതിരെയുള്ള വിവാദ പോസ്‌റ്റ് വന്നത്. പോസ്‌റ്റ് പ്രത്യക്ഷപ്പെട്ട് അധികം വൈകാതെ തന്നെ നീക്കം ചെയ്‌തെങ്കിലും മിനിറ്റുകൾക്കുള്ളിൽ പോസ്‌റ്റ് വൈറലായി.
ന്യൂഡെൽഹി: ചീഫ് ജസ്‌റ്റിസ് സൂര്യകാന്തിനെതിരെ സാമൂഹിക മാദ്ധ്യമങ്ങളിൽ അപകീർത്തികരമായ പോസ്‌റ്റ് പങ്കുവെച്ച സംഭവത്തിൽ കെപിസിസി പ്രസിഡണ്ടിനും ഭാരവാഹികൾക്കും നോട്ടീസ് അയച്ച് സുപ്രീം കോടതി. സിവിലായും, ക്രിമിനലായും കോടതിയലക്ഷ്യ നടപടി എടുക്കാതിരിക്കാൻ കാരണം ഉണ്ടെങ്കിൽ ബോധ്യപ്പെടുത്താൻ കെപിസിസി ഭാരവാഹികളോട് കോടതി നിർദ്ദേശിച്ചു.
കോടതിയുടെ അധികാരത്തെയും അന്തസിനെയും ചോദ്യം ചെയ്യുന്ന തരത്തിലുള്ള ഇത്തരം നടപടികളെ ശക്‌തമായി നേരിടുമെന്നും സുപ്രീം കോടതി വ്യക്‌തമാക്കി. കെപിസിസിക്ക് എതിരായ ഹരജിയിൽ സുപ്രീം കോടതി അമിക്കസ് ക്യൂറിയെ നിയമിച്ചു. കേസിൽ ഹാജരാകാൻ അറ്റോർണി ജനറലിനോടും സുപ്രീം കോടതി നിർദ്ദേശിച്ചു.
കേസ് പരിഗണിച്ച വേളയിൽ കെപിസിസിക്ക് വേണ്ടി ഹാജരായ അഭിഭാഷകൻ കോടതിയിൽ നിരുപാധികം മാപ്പ് അപേക്ഷിച്ചെങ്കിലും സുപ്രീം കോടതി അത് സ്വീകരിക്കാൻ തയ്യാറായില്ല. ആദ്യം പരസ്യമായി താറടിച്ച് കാണിക്കുക, അതിനുശേഷം വന്ന് മാപ്പ് പറയുക എന്ന് പറയുന്നതിൽ എന്ത് കാര്യമാണുള്ളതെന്ന് കോടതി രൂക്ഷമായി ആരാഞ്ഞു.
ചീഫ് ജസ്‌റ്റിസിനെയും നീതിന്യായ വ്യവസ്‌ഥയെയും തരംതാഴ്‌ത്താൻ ബോധപൂർവമായ ശ്രമം നടന്നതായാണ് കോടതി വിലയിരുത്തുന്നത്. ഒക്‌ടോബർ 12നാണ് കെപിസിസിയുടെ ഔദ്യോഗിക എക്‌സ് ഹാൻഡിലിൽ ചീഫ് ജസ്‌റ്റിസിനെതിരെയുള്ള വിവാദ പോസ്‌റ്റ് വന്നത്.
”പ്രിയ സൂര്യകാന്ത്, നിയമവും വ്യവസ്‌ഥയും നിങ്ങളുടെ പരിധിയിലല്ലെങ്കിൽ ഇപ്പോൾ തന്നെ രാജിവെക്കൂ. അത് കൈകാര്യം ചെയ്യാൻ കഴിയുന്ന ഒരാളെ ഞങ്ങൾ കണ്ടെത്തിക്കൊള്ളാം” എന്നായിരുന്നു പോസ്‌റ്റ്. എന്നാൽ, പോസ്‌റ്റ് പ്രത്യക്ഷപ്പെട്ട് അധികം വൈകാതെ തന്നെ നീക്കം ചെയ്‌തെങ്കിലും മിനിറ്റുകൾക്കുള്ളിൽ പോസ്‌റ്റ് വൈറലായി.
അഭിപ്രായങ്ങളുടെ ആധികാരികത ഉറപ്പിക്കുന്നതിന് വേണ്ടി കൃത്യമായ ഇ-മെയിൽ വിലാസവും ഫോട്ടോയും ഉൾപ്പെടുത്താൻ ശ്രമിക്കുക. രേഖപ്പെടുത്തപ്പെടുന്ന അഭിപ്രായങ്ങളിൽ 'ഏറ്റവും മികച്ചതെന്ന് ഞങ്ങളുടെ എഡിറ്റോറിയൽ ബോർഡിന്' തോന്നുന്നത് പൊതു ശബ്‌ദം എന്ന കോളത്തിലും സാമൂഹിക മാദ്ധ്യമങ്ങളിലും ഉൾപ്പെടുത്തും. ആവശ്യമെങ്കിൽ എഡിറ്റ് ചെയ്യും. ശ്രദ്ധിക്കുക; മലബാർ ന്യൂസ് നടത്തുന്ന അഭിപ്രായ പ്രകടനങ്ങളല്ല ഇവിടെ പോസ്‌റ്റ് ചെയ്യുന്നത്. ഇവയുടെ പൂർണ ഉത്തരവാദിത്തം രചയിതാവിനായിരിക്കും. അധിക്ഷേപങ്ങളും അശ്‌ളീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്.
