മലയാളത്തിന്റെ ‘സൂപ്പർമാൻ’ ടൊവിനോ തോമസിന്റെ ‘അന്വേഷിപ്പിന്‍ കണ്ടെത്തും‘ എന്ന പുതിയ ചിത്രത്തിന്റെ ഫസ്‌റ്റ്ലുക്ക് പോസ്‌റ്റര്‍ പുറത്തുവിട്ടു. ടൊവിനോയുടെ പിറന്നാൾ ദിനമായ ഇന്ന് സൂപ്പർ സ്‌റ്റാർ മോഹൻലാൽ ആണ് ചിത്രത്തിന്റെ പോസ്‌റ്റർ പുറത്തുവിട്ടത്. തന്റെ സോഷ്യല്‍ മീഡിയ പേജിലൂടെയാണ് മോഹൻലാൽ പോസ്‌റ്റര്‍ റിലീസ് ചെയ്‌തത്.
പോസ്‌റ്റിൽ ടൊവിനോക്ക് പിറന്നാൾ ആശംസകളും താരം നേർന്നു. ‘അന്വേഷണങ്ങളുടെ കഥയല്ല..അന്വേഷകരുടെ കഥയാണ്’ എന്ന ടാഗ് ലൈനോടെയുള്ള സിനിമയുടെ സംവിധാനം നവാഗതനായ ഡാര്‍വിന്‍ കുര്യാക്കോസ് ആണ്.
ത്രില്ലര്‍ സ്വഭാവമുള്ള സിനിമയുടെ ചിത്രീകരണം ഈ വർഷം ആരംഭിക്കുമെന്നാണ് അണിയറ പ്രവർത്തകർ പറയുന്നത്. ചിത്രത്തിൽ വേറിട്ട ഗെറ്റപ്പിലാകും ടൊവിനോ എത്തുകയെന്നും റിപ്പോർട്ടുണ്ട്.
‘ആദം ജോണ്‍’, ‘കടുവ’ തുടങ്ങിയ ചിത്രങ്ങള്‍ക്ക് തിരക്കഥ ഒരുക്കിയ ജിനു വി എബ്രഹാമിന്റേതാണ് തിരക്കഥ. ഗിരീഷ് ഗംഗാധരന്‍ ഛായാഗ്രഹണവും സന്തോഷ് നാരായണന്‍ സംഗീത സംവിധാനവും നിർവഹിക്കുന്നു. തമിഴ് സംഗീതകാരനായ സന്തോഷ് നാരായണന്റെ ആദ്യ മലയാള ചിത്രം കൂടിയാണിത്. സൈജു ശ്രീധരനാണ് ചിത്രത്തിന്റെ എഡിറ്റിങ്.
Read Also: കെ സുധാകരൻ കെപിസിസി അധ്യക്ഷനാവും; തീരുമാനം ഉടൻ
