അബുദാബി: സ്‌കൂളുകളിൽ മാസ്‌കും സാമൂഹിക അകലവും ഒഴിവാക്കാനുള്ള നടപടികൾ സ്വീകരിച്ച് അബുദാബി. ഉയർന്ന വാക്‌സിനേഷൻ തോതുള്ളതിനെ തുടർന്നാണ് അബുദാബിയിൽ കോവിഡ് നിയന്ത്രണങ്ങളിൽ ഇളവുകൾ നൽകാൻ തീരുമാനിച്ചിരിക്കുന്നത്. അതേസമയം ഈ നിയന്ത്രണങ്ങൾ ജനുവരി മുതലായിരിക്കും പ്രാബല്യത്തിൽ വരികയെന്നും അധികൃതർ വ്യക്‌തമാക്കി.
വിദ്യാർഥികളിലെ വാക്‌സിനേഷൻ തോത് അടിസ്‌ഥാനമാക്കി സ്‌കൂളുകൾക്ക് കളർ കോഡ് നൽകി വേർതിരിച്ച ശേഷമായിരിക്കും ഇളവുകൾ നൽകുക. വാക്‌സിൻ എടുത്ത കുട്ടികൾ 50 ശതമാനത്തിൽ താഴെയാണെങ്കിൽ ഓറഞ്ച്, 50-64 ശതമാനം വരെയാണെങ്കിൽ മഞ്ഞ, 65-84 ശതമാനം ആണെങ്കിൽ പച്ച, 85 ശതമാനത്തിന് മുകളിൽ ആണെങ്കിൽ നീല എന്നിങ്ങനെ ആയിരിക്കും കളർ കോഡ് ഉണ്ടാവുക.
ഇതിൽ നീല കളർ കോഡുള്ള സ്‌കൂളുകൾക്കാണ് മാസ്‌കും സാമൂഹിക അകലവും ഒഴിവാക്കാൻ അവസരം ഉണ്ടാകുക. കൂടാതെ പഠന യാത്ര, അസംബ്ളി, കായിക പരിപാടി, സ്‌കൂൾ വാർഷിക പരിപാടി തുടങ്ങിയവയും അനുവദിക്കും. 16 വയസിന് മുകളിലുള്ള വിദ്യാർഥികൾ, അധ്യാപകർ, മറ്റ് ജീവനക്കാർ എന്നിവർക്ക് വാക്‌സിൻ നിർബന്ധമാണ്. എന്നാൽ 16 വയസിന് താഴെയുള്ളവരെ വാക്‌സിൻ എടുക്കാൻ നിർബന്ധിക്കാൻ പാടില്ലെന്നും അധികൃതർ വ്യക്‌തമാക്കി.
Read also: കനത്ത മഴ ഉത്തരേന്ത്യയിലും; ഡെൽഹിയിൽ താഴ്ന്ന പ്രദേശങ്ങൾ വെള്ളത്തിനടിയിൽ
