തിരുവനന്തപുരം: ശാസ്‌തമംഗലത്ത് വള മോഷ്‌ടിച്ചെന്ന് ആരോപിച്ച് നടുറോഡില്‍ യുവതിക്ക് ക്രൂര മർദ്ദനം. ഇന്നലെ ഉച്ചക്കാണ് സംഭവം. മർദ്ദനമേറ്റ യുവതിക്ക് മാനസികാസ്വാസ്‌ഥ്യം ഉണ്ടെന്ന് സംശയിക്കുന്നതായി പോലീസ് പറഞ്ഞു. സംഭവത്തില്‍ മ്യൂസിയം പോലീസ് കേസെടുത്തിട്ടുണ്ട്.
ശാസ്‌തമംഗലത്ത് പ്രവര്‍ത്തിക്കുന്ന ഒരു ബ്യൂട്ടി പാര്‍ലറിന് മുന്നില്‍ വച്ചാണ് സംഭവം. ബ്യൂട്ടി പാര്‍ലര്‍ ജീവനക്കാര്‍ തന്നെയാണ് യുവതി വള മോഷ്‌ടിച്ചെന്ന് ആരോപിച്ച് ക്രൂരമായി മർദ്ദിച്ചത്. സ്‌ത്രീ ഉറക്കെ നിലവിളിക്കുന്നതും പുറത്തുവന്ന വീഡിയോയില്‍ വ്യക്‌തമാണ്‌.
മരുതംകുഴി സ്വദേശിയായ യുവതിക്കാണ് മർദ്ദനമേറ്റത്. എന്നാല്‍ ബ്യൂട്ടി പാര്‍ലറിലെത്തി യുവതി തങ്ങളെ പ്രകോപിപ്പിച്ചതിനാലാണ് മർദ്ദിച്ചതെന്നാണ് ബ്യൂട്ടിപാര്‍ലര്‍ ജീവനക്കാരുടെ വിശദീകരണം. ജീവനക്കാരുടെ മൊബൈല്‍ ഫോണ്‍ ഉൾപ്പടെ യുവതി കയ്യിലെടുത്ത് ശല്യം ചെയ്‌തതാണ് പ്രശ്‌നത്തിന് കാരണമായതെന്നും ഇവര്‍ പറഞ്ഞു.
Most Read: ചോറ്റാനിക്കരയിൽ പിഞ്ചുകുഞ്ഞിന് ക്രൂരമർദ്ദനം; ആയ അറസ്‌റ്റിൽ
