കൊച്ചി: നടി ആക്രമിക്കപ്പെട്ട കേസിൽ വിചാരണ പൂർത്തിയാക്കാൻ കൂടുതൽ സമയം ആവശ്യപ്പെട്ട് വിചാരണ കോടതി ജഡ്ജി നൽകിയ അപേക്ഷ സുപ്രീം കോടതി തിങ്കളാഴ്‌ച പരിഗണിക്കും. വിചാരണ പൂർത്തിയാക്കാൻ ആറ് മാസം സമയം കൂടി അനുവദിക്കണമെന്നാണ് വിചാരണ കോടതി ജഡ്ജി ആവശ്യപ്പെട്ടത്. ജസ്‌റ്റിസുമാരായ എഎം ഖാൻവിൽക്കർ, സഞ്‌ജീവ് ഖന്ന എന്നിവരടങ്ങിയ ബെഞ്ചാണ് അപേക്ഷ പരിഗണിക്കുക.
വിചാരണ പൂർത്തിയാക്കാൻ സമയം ആവശ്യപ്പെട്ട് മൂന്നാം തവണയാണ് വിചാരണ കോടതി ജഡ്ജി സുപ്രീം കോടതിക്ക് കത്ത് നൽകുന്നത്. കോവിഡ് പശ്‌ചാത്തലത്തിൽ കോടതിയുടെ പ്രവർത്തനം സുഗമമായി നടത്താൻ സാധിക്കാത്തതിനാലാണ് നിർദേശിച്ച സമയ പരിധിക്കുള്ളിൽ വാദം കേൾക്കലും വിധി പ്രസ്‌താവവും പൂർത്തിയാക്കാൻ കഴിയാത്തതെന്ന് കത്തിൽ ചൂണ്ടിക്കാണിക്കുന്നു.
കേസിൽ വിധി പ്രസ്‌താവിക്കാൻ സുപ്രീം കോടതി അനുവദിച്ച സമയം ഓഗസ്‌റ്റ് മൂന്നിന് അവസാനിച്ച സാഹചര്യത്തിലാണ് വിചാരണ കോടതി ജഡ്ജി സുപ്രീം കോടതിക്ക് കത്ത് നൽകിയത്.
Read also: നടിയെ ആക്രമിച്ച കേസ്; കാവ്യയുടെ വിസ്‌താരം ഇന്നും തുടരും
