അബുദാബി : ഇന്ത്യയിൽ നിന്നുള്ള യാത്രാവിലക്ക് ഭാഗികമായി പിൻവലിച്ചതോടെ യുഎഇയിലേക്കുള്ള വിമാന സർവീസുകൾ ഈ മാസം 23ആം തീയതി മുതൽ പുനഃരാരംഭിക്കുമെന്ന് വ്യക്തമാക്കി എമിറേറ്റ്സ് എയർലൈൻ. യുഎഇ അംഗീകാരം നൽകിയിട്ടുള്ള കോവിഡ് വാക്സിന്റെ 2 ഡോസും സ്വീകരിച്ച ആളുകൾക്ക് മാത്രമാണ് പ്രവേശന അനുമതി നൽകുന്നത്.
ഇതിനൊപ്പം തന്നെ മറ്റ് കോവിഡ് മാനദണ്ഡങ്ങളും പാലിക്കണമെന്ന് അധികൃതർ കർശന നിർദ്ദേശം നൽകിയിട്ടുണ്ട്. ഇന്ത്യയിലെ എല്ലാ പ്രധാന നഗരങ്ങളിലേക്കും എമിറേറ്റ്സ് എയർലൈൻ സർവീസ് ആരംഭിക്കും. കേരളത്തിൽ തിരുവനന്തപുരം, കൊച്ചി, കോഴിക്കോട് എന്നീ വിമാനത്താവളങ്ങളിലേക്കും സർവീസ് ഉണ്ടായിരിക്കും. ഇന്ത്യക്ക് ഒപ്പം നൈജീരിയ, ദക്ഷിണാഫ്രിക്ക എന്നീ രാജ്യങ്ങളിൽ നിന്നും സർവീസ് ആരംഭിക്കാൻ എമിറേറ്റ്സ് എയർലൈൻ തീരുമാനിച്ചിട്ടുണ്ട്.
എന്നാൽ ഓരോ രാജ്യത്തെയും കോവിഡ് സാഹചര്യങ്ങൾ വ്യത്യസ്തമായതിനാൽ അവ വിലയിരുത്തുമെന്നും, ശേഷം ഓരോ രാജ്യത്തെ യാത്രക്കാർക്കും വ്യത്യസ്ത നിബന്ധനകളായിരിക്കും ഏർപ്പെടുത്തുകയെന്നും അധികൃതർ വ്യക്തമാക്കി.
Read also : കോവിഡ് നഷ്ടപരിഹാരം; പദ്ധതി വേണമെന്ന് സുപ്രീം കോടതി