കൊച്ചി: സംസ്‌ഥാനത്ത്‌ ഒരുദിവസത്തെ മദ്യവിൽപന വഴിയുള്ള വരുമാനം 100 കോടി കടന്ന ദിവസമാണ് ഈ വർഷത്തെ ഉത്രാടദിനം! ഉത്രാടദിനത്തിൽ മാത്രം സംസ്‌ഥാനത്ത്‌ വിട്ടത് 117 കോടി രൂപയുടെ മദ്യമാണ്. കഴിഞ്ഞ വര്‍ഷം ഉത്രാടത്തിന് 85 കോടി രൂപയുടെ മദ്യമാണ് വിറ്റത്. ഈ വർഷത്തെ വിൽപനയിൽ ഒന്നാമത് എത്തിയത് കൊല്ലം ജില്ലയിലെ ആശ്രാമം ഔട്ട്ലെറ്റിന്!
കൊല്ലം ആശ്രാമം ബെവ്‌കോ ഔട്ട്ലെറ്റിൽ 1.06 കോടി രൂപയുടെ മദ്യമാണ് വിറ്റത്. ഈ വര്‍ഷത്തെ ഓണം സീസണിലെ മൊത്തം വില്‍പനയിലും ബെവ്‌കോ വലിയ നേട്ടമുണ്ടാക്കി. ഒരാഴ്‌ച കൊണ്ട് 624 കോടി രൂപയുടെ മദ്യം വിറ്റെന്നാണ് കണക്ക്. കഴിഞ്ഞ വര്‍ഷം ഇത് 529 കോടിയായിരുന്നു.
ഒരു കോടിയിലധികം രൂപയുടെ മദ്യം വിറ്റത് കൊല്ലം ആശ്രമം ഔട്ട്ലെറ്റ് മാത്രമല്ല. തിരുവനന്തപുരം പവർഹൌസ് ഔട്ട്ലെറ്റിൽ 1.01 കോടി രൂപയുടെ മദ്യമാണ് വിറ്റത്. തൃശൂർ ജില്ലയിലെ ഇരിങ്ങാലക്കുടയിൽ 1.001 കോടി രൂപയുടെ മദ്യം വിറ്റു. ചേര്‍ത്തല കോര്‍ട്ട് ജംഗ്ഷന്‍ (98.50 ലക്ഷം രൂപ), പയ്യന്നൂര്‍ (95.05 ലക്ഷം രൂപ), ചാലക്കുടി (91.84 ലക്ഷം രൂപ) തുടങ്ങിയ ഔട്ട്ലെറ്റുകളാണ് വിൽപനയിൽ റെക്കോഡ് രേഖപ്പെടുത്തിയത്.
Most Read: ബഹുഭാര്യത്വവും തഹ്‌ലീല്‍ ആചാരവും ഭരണഘടനാ ബെഞ്ചില്‍; കേന്ദ്ര സർക്കാരിന് നോട്ടീസ്
