മലയാളികളുടെ പ്രിയ സംവിധായകരാണ് അന്‍വര്‍ റഷീദും മിഥുന്‍ മാനുവല്‍ തോമസും. തങ്ങളുടെ പുതിയ ചിത്രത്തിന്റെ വിശേഷം പങ്കുവച്ചിരിക്കുകയാണ് ഇരുവരുമിപ്പോള്‍. തമിഴില്‍ തങ്ങളുടെ ആദ്യ ചിത്രം ഒരുക്കാനുള്ള തയ്യാറെടുപ്പിലാണ് രണ്ടു സംവിധായകരും.
ഫഹദ് ഫാസിലിന്റെ ട്രാന്‍സ് ആയിരുന്നു അന്‍വര്‍ റഷീദിന്റെ അവസാനം ഇറങ്ങിയ ചിത്രം. ട്രാന്‍സിന്റെ വിജയത്തിന് പിന്നാലെ തമിഴില്‍ പുതിയ ചിത്രത്തിന്റെ സംവിധാനത്തിന് ഒരുങ്ങുകയാണ് അന്‍വര്‍ റഷീദ്. മിഥുന്‍ മാനുവല്‍ തോമസാണ് ചിത്രത്തിന്റെ തിരക്കഥ എഴുതുന്നത്. മിഥുനാണ് ഇക്കാര്യം ഫേസ്ബുക്കിലൂടെ സിനിമാപ്രേക്ഷകരെ അറിയിച്ചിരിക്കുന്നത്.
ഇരുവരുടെയും ആദ്യ തമിഴ് ചിത്രമാണിത്. ചിത്രത്തിലെ നായകനായി എത്തുന്നത് കൈതി എന്ന ചിത്രത്തിലൂടെ ശ്രദ്ധേയനായ അര്‍ജുന്‍ ദാസാണ്. ചിത്രത്തിന്റെ കൂടുതല്‍ വിവരങ്ങള്‍ പിന്നീട് അറിയിക്കുമെന്നും മിഥുന്‍ തന്റെ കുറിപ്പില്‍ വ്യക്തമാക്കി.
