ഡെല്ഹി: ഉത്തരാഖണ്ഡിലും പക്ഷിപ്പനി സ്ഥിരീകരിച്ചതോടെ രാജ്യത്ത് വൈറസ് ബാധ സ്ഥിരീകരിച്ച സംസ്ഥാനങ്ങളുടെ എണ്ണം പത്തായി. പക്ഷിപ്പനി കൂടുതല് സ്ഥലങ്ങളിലേക്ക് വ്യാപിക്കുന്ന സാഹചര്യത്തില് സംസ്ഥാനങ്ങള് അതീവ ജാഗ്രത പുലര്ത്തണമെന്ന് കേന്ദ്രം നിര്ദേശം നല്കി.
ഉത്തരാഖണ്ഡിനെ കൂടാതെ ഇന്ന് രാജസ്ഥാനിലും പക്ഷിപ്പനി സ്ഥിരീകരിച്ചിരുന്നു. ഹരിയാനയില് ഇതുവരെ ചത്തനിലയില് കണ്ടെത്തിയത് നാല് ലക്ഷം പക്ഷികളെയാണ്. കൂടാതെ മഹാരാഷ്ട്രയിലെ പര്ഭാനി ജില്ലയില് 800 ഇറച്ചിക്കോഴികളെയാണ് ചത്തനിലയില് കണ്ടെത്തിയത്. ഇവിടെ വൈറസ് സാന്നിധ്യം സ്ഥിരീകരിച്ചതോടെ 9000 ഇറച്ചികോഴികളെ നശിപ്പിക്കാനുള്ള നടപടി ആരംഭിച്ചിട്ടുണ്ട്.
രാജ്യതലസ്ഥാനത്തും പക്ഷിപ്പനി സ്ഥിരീകരിച്ചിരുന്നു. ചത്തനിലയില് കണ്ടെത്തിയ താറാവിലും കാക്കയിലുമാണ് ഡെല്ഹിയില് വൈറസ് സാന്നിധ്യം സ്ഥിരീകരിച്ചത്. പക്ഷിപ്പനിയുടെ വ്യാപനം കണക്കിലെടുത്ത് കേന്ദ്രം സംസ്ഥാനങ്ങള്ക്ക് ജാഗ്രതാ നിര്ദേശം കൈമാറിയിട്ടുണ്ട്.