പിലാത്തറ: ദേശീയ നിലവാരത്തില്‍ പിലാത്തറയില്‍ നിര്‍മിച്ച ഇന്‍ഡോര്‍ സ്റ്റേഡിയം മുഖ്യമന്ത്രി പിണറായി വിജയന്‍ നാടിന് സമര്‍പ്പിച്ചു. വീഡിയോ കോണ്‍ഫറന്‍സിലൂടെയാണ് മുഖ്യമന്ത്രി സ്റ്റേഡിയത്തിന്റെ ഉദ്ഘാടനം നിര്‍വഹിച്ചത്. ടി വി രാജേഷ് എംഎല്‍എയുടെ ആസ്തി വികസന ഫണ്ടില്‍ നിന്ന് ഒരുകോടിയും സംസ്ഥാന സര്‍ക്കാരില്‍ നിന്നുള്ള 1.82 കോടി രൂപയും ഉപയോഗിച്ചാണ് സ്റ്റേഡിയം നിര്‍മിച്ചത്. കായികമന്ത്രി ഇ പി ജയരാജന്‍ ചടങ്ങില്‍ അധ്യക്ഷത വഹിച്ചു. ടി വി രാജേഷ് എംഎല്‍എ മുഖ്യാതിഥിയായി പങ്കെടുത്തു.
ആധുനിക സജ്ജീകരണത്തോടെയാണ് സ്റ്റേഡിയം പണികഴിപ്പിച്ചിരിക്കുന്നത്. ബാസ്‌കറ്റ് ബോള്‍ കോര്‍ട്ട്, വോളിബോള്‍ കോര്‍ട്ട്, നാല് ഷട്ടില്‍ കോര്‍ട്ട് എന്നിവയും സ്റ്റേഡിയത്തില്‍ ഒരുക്കിയിട്ടുണ്ട്. അരീന ലൈറ്റിങ് സംവിധാനം കൂടാതെ രാത്രി പരിശീലനത്തിന് എല്‍ഇഡി ഫ്‌ലെഡ് ലിറ്റ് സംവിധാനവും ഇവിടെ ഒരുക്കിയിട്ടുണ്ട്. 400ലധികം പേര്‍ക്ക് ഇരിക്കാവുന്ന ഗ്യാലറിയും വെള്ളം ശേഖരിക്കുന്നതിനായി 60,000 ലിറ്റര്‍ കപ്പാസിയുള്ള ടാങ്കും സ്റ്റേഡിയത്തിലുണ്ട്.
മാത്രവുമല്ല സ്റ്റേഡിയത്തില്‍ അന്തര്‍ദേശിയ നിലവാരത്തിലുള്ള മേപ്പിള്‍ വുഡ് ഫ്‌ലോറിങ് ചെയ്യാന്‍ എംഎല്‍എ ഫണ്ടില്‍നിന്നും 42 ലക്ഷം രൂപയുടെ ഭരണാനുമതി ലഭിച്ചിട്ടുണ്ട്. ഈ പ്രവൃത്തിയും വേഗത്തില്‍ പൂര്‍ത്തീകരിക്കുമെന്ന് അധികൃതര്‍ അറിയിച്ചു.
ചെറുതാഴം പഞ്ചായത്ത് പ്രസിഡന്റ് പി പ്രഭാവതി സ്വാഗതം പറഞ്ഞു. എസ് രാജീവ് റിപ്പോര്‍ട്ട് അവതരണം നടത്തി. ബ്ലോക്ക് പഞ്ചായത്ത് പ്രസിഡന്റ് വി വി പ്രീത, സ്റ്റേറ്റ് സ്‌പോര്‍ട്‌സ് കൗണ്‍സില്‍ വൈസ് പ്രസിഡന്റ് ഒ കെ വിനീഷ്, കെ കെ പവിത്രന്‍, ടി വി ഉണ്ണികൃഷ്ണന്‍, പി കുഞ്ഞികണ്ണന്‍, കെ വനജ, പി പി ദാമോദരന്‍, കെ പത്മനാഭന്‍, സി എം വേണുഗോപാലന്‍, എം ശ്രീധരന്‍, എം ബാലകൃഷ്ണന്‍, യു രാമചന്ദ്രന്‍, കെ നാരായണന്‍, നജുമുദിന്‍, കെ സി രഘുനാഥ്, കേശവന്‍, അനന്തകൃഷ്ണന്‍ തുടങ്ങിയവര്‍ സംസാരിച്ചു.
National News: അണ്‍ലോക്ക് നാലാം ഘട്ടം പൂര്‍ത്തിയാകുന്നു
