പാലക്കാട്: കോവിഡ് പ്രതിരോധ പ്രവർത്തനങ്ങൾക്ക് ശക്‌തി പകർന്ന് ചെമ്പൈ സംഗീത കോളേജിൽ പ്രവർത്തിക്കുന്ന ജില്ലാ കോവിഡ് കൺട്രോൾ റൂം.ഇവിടെ 24 മണിക്കൂറും സേവനം ലഭ്യമാണ്. കോവിഡ് രോഗികളുടെ വിവരങ്ങൾ ശേഖരിക്കുക, തരംതിരിക്കുക, വിവരങ്ങൾ കൃത്യമായി ആരോഗ്യവകുപ്പിനെ അറിയിക്കുക, ഡോക്‌ടറുടെ സേവനം ലഭ്യമാക്കുക.
ആംബുലൻസ് സൗകര്യം ഒരുക്കുക തുടങ്ങിയ സേവങ്ങൾക്ക് പുറമെ ആശുപത്രികളിലെ കിടക്കകളുടെ ലഭ്യതയും കൺട്രോൾ റൂമിൽ നിന്നറിയും. ഓക്‌സിജൻ വാർ റൂമും ഈ കൺട്രോൾ റൂമിന്റെ ഭാഗമായാണ് പ്രവർത്തിക്കുന്നത്. 35ലേറെ ജീവനക്കാർ ഇവിടെയുണ്ട്‌.
ലക്ഷണമില്ലാത്ത രോഗികൾ, വീടുകളിൽ ചികിൽസ വേണ്ടവർ, ആശുപത്രി സേവനം ആവശ്യമുള്ളവർ എന്നിവ ലഭിക്കുന്ന വിവരങ്ങളിലൂടെ ഇവിടെ നിന്നും ശേഖരിക്കും. ആംബുലൻസ് വേണ്ടവർക്ക് ഏർപ്പാടാക്കി നൽകുന്നുണ്ട്. കൺട്രോൾ റൂമിൽ ആശുപത്രി സേവനം ആവശ്യമുള്ളവരെ കണ്ടെത്തുന്നതിനായി ഡോക്‌ടറുടെ സേവനമുണ്ട്. ഇതിനായി ഗൂഗിൾ ഷീറ്റിൽ വിവരങ്ങൾ നൽകി സൂക്ഷിക്കും.
ഓരോദിവസത്തെയും വിവരങ്ങൾ കൃത്യമായി ആരോഗ്യവകുപ്പിന് കൈമാറുന്നു. ഡോ. മേരി ജ്യോതിയാണ് നോഡൽ ഓഫീസർ. കൺട്രോൾ റൂം നമ്പറുകൾ: 0491–2510574, 575, 576, 577, 578, 579, 580, 581, 582, 583 എന്നിവയാണ്. ഓക്‌സിജൻ വാർ റൂം നമ്പറുകൾ: 88989 02376, 0491–2510600, 603, 604, 605.
Read Also: ചെറിയ പെരുന്നാൾ; മാംസവിൽപന ശാലകൾ തുറക്കാം; ഇന്ന് നിയന്ത്രണങ്ങളിൽ ഇളവ്
