സാവോപോളോ: ബ്രസീലില്‍ കോവിഡ് ബാധിച്ച് മരിച്ചവരുടെ എണ്ണം ഒന്നര ലക്ഷം കടന്നു. കോവിഡ് രോഗ വ്യാപനം രൂക്ഷമായി തുടരുന്ന ബ്രസീല്‍ ലോകത്ത് ഏറ്റവും കൂടുതല്‍ കോവിഡ് മരണങ്ങള്‍ റിപ്പോര്‍ട്ട് ചെയ്‌ത രാജ്യങ്ങളില്‍ ഒന്നാണ്. കൂടാതെ ബ്രസീല്‍ തന്നെയാണ് കോവിഡ് ബാധിതരുടെ എണ്ണത്തില്‍ മൂന്നാം സ്ഥാനത്തുള്ളതും.
ബ്രസീലില്‍ 50 ലക്ഷത്തിലധികം പേര്‍ക്കാണ് ഇതുവരെയായി കോവിഡ് രോഗബാധ സ്ഥിരീകരിച്ചത്. സൗത്ത് അമേരിക്കയില്‍ ഏറ്റവും കൂടുതല്‍ പേര്‍ കോവിഡ് ബാധിച്ച് മരിച്ചത് ബ്രസീലിലാണ്.
രാജ്യത്ത് സാവോപോളോയിലാണ് കോവിഡ് വ്യാപനം രൂക്ഷമായിട്ടുള്ളത്. അതേസമയം കോവിഡ് പ്രതിരോധവുമായി ബന്ധപ്പെട്ട വിദഗ്‌ധോപദേശങ്ങളെ പ്രസിഡണ്ട് ജെയ്ര് ബൊല്‍സൊനാരോ അവഗണിച്ചതാണ് രാജ്യത്ത് കോവിഡ് വ്യാപനം രൂക്ഷമാകാന്‍ കാരണമായതെന്ന് പരക്കെ ആക്ഷേപം നിലനില്‍ക്കുന്നുണ്ട്
നിലവിലെ ലഭ്യമായ കണക്കുകള്‍ പ്രകാരം 1,50,198 പേരാണ് ബ്രസീലില്‍ കോവിഡ് ബാധിച്ച് മരണപ്പെട്ടത്. അതേസമയം 50,82,637 പേര്‍ രാജ്യത്ത് ഇതുവരെയായി രോഗമുക്‌തി നേടുകയും ചെയ്‌തിട്ടുണ്ട്. കഴിഞ്ഞ മാര്‍ച്ചിലാണ് രാജ്യത്ത് ആദ്യമായി കോവിഡ് മരണം റിപ്പോര്‍ട്ട് ചെയ്‌തത്.
Read Also: സംസ്‌ഥാനത്തെ വിനോദ സഞ്ചാര കേന്ദ്രങ്ങള്‍ നാളെ മുതല്‍ തുറക്കുന്നു
