തിരുവനന്തപുരം: സംസ്ഥാനത്ത് കോവിഡ് വര്ധിക്കാതിരിക്കാന് എല്ലാവരുടേയും സഹകരണവും ശ്രദ്ധയും ഉണ്ടാകണമെന്ന് ആരോഗ്യ മന്ത്രി വീണാ ജോര്ജ്. ആരോഗ്യ വകുപ്പ് കോവിഡ് സാഹചര്യം വിലയിരുത്തുന്നുണ്ട്. എല്ലാ ജില്ലകള്ക്കും പ്രതിരോധം ശക്തമാക്കാന് നിർദ്ദേശം നല്കിയിട്ടുണ്ട്. കോവിഡ് കേസുകള് 1000ന് മുകളില് റിപ്പോർട് ചെയ്ത എറണാകുളം, തിരുവനന്തപുരം ജില്ലകള്ക്ക് പ്രത്യേക ജാഗ്രത നല്കിയിട്ടുണ്ട്. സംസ്ഥാനത്ത് ആശങ്കപ്പെടേണ്ട കാര്യമില്ലെന്നും മന്ത്രി പറഞ്ഞു.
ആശുപത്രികളിലും ഐസിയുവിലും ചികിൽസ തേടുന്നവരുടെ എണ്ണം കുറവാണ്. 27,991 ആക്ടീവ് കേസുകൾ ഉണ്ടായിരുന്നതില് 1285 പേര് ആശുപത്രികളിലും 239 പേര് ഐസിയുവിലും 42 പേര് വെന്റിലേറ്ററുകളിലും ചികിൽസയിലുണ്ട്. പ്രായമായവരിലും അനുബന്ധ രോഗമുള്ളവരിലും വാക്സിന് എടുക്കാത്തവരിലുമാണ് കൂടുതലും രോഗം ഗുരുതരമാകുന്നത്. അതിനാല് തന്നെ അവര് കൂടുതല് ശ്രദ്ധിക്കണമെന്നും മന്ത്രി പറഞ്ഞു.
ആരില് നിന്നും ആരിലേക്കും കോവിഡ് ബാധിക്കാന് സാധ്യതയുണ്ട്. അതിനാല് വ്യക്തിപരമായ ശ്രദ്ധ ഏറെ പ്രധാനമാണ്. കോവിഡിനെ പ്രതിരോധിക്കാന് എല്ലാവരും നിര്ബന്ധമായും മാസ്ക് ധരിക്കണം. ഇടക്കിടെ സോപ്പും വെള്ളവും ഉപയോഗിച്ചോ സാനിറ്റൈസര് ഉപയോഗിച്ചോ കൈ വൃത്തിയാക്കണം. കൈ വൃത്തിയാക്കാതെ കണ്ണ്, മൂക്ക്, വായ് എന്നിവ സ്പർശിക്കരുത്. ആദ്യ ഡോസും രണ്ടാം ഡോസും കരുതല് ഡോസും എടുക്കാനുള്ള എല്ലാവരും വാക്സിന് എടുക്കേണ്ടതാണ്.
സ്കൂള് തുറന്ന സാഹചര്യത്തില് കുട്ടികളെയും ശ്രദ്ധിക്കേണ്ടതാണ്. കൃത്യമായി മാസ്ക് ധരിപ്പിച്ച് മാത്രം സ്കൂളില് വിടുക. 12 വയസിന് മുകളിലുള്ള എല്ലാ കുട്ടികള്ക്കും കോവിഡ് വാക്സിന് നല്കുക. കുട്ടികളില് നിന്നും പ്രായമുള്ളവരിലേക്കും മറ്റ് അസുഖമുള്ളവരിലേക്കും കോവിഡ് ബാധിക്കാന് സാധ്യതയുള്ളതിനാല് പ്രത്യേകം ശ്രദ്ധിക്കണം. കുട്ടികള് സ്കൂളില് നിന്നും മുതിര്ന്നവര് ജോലിക്ക് പോയിട്ടും വീട്ടില് എത്തിയാലുടന് വസ്ത്രങ്ങള് മാറ്റി കുളിച്ചതിന് ശേഷം മാത്രമേ ഇവരുമായി ഇടപെടാവൂ.
ജലദോഷം, പനി, ചുമ, ശ്വാസതടസം തുടങ്ങിയ രോഗ ലക്ഷണങ്ങളുള്ളവര് ഇവരോട് ഇടപഴകരുത്. പുറത്ത് പോയി വരുന്നവരില് നിന്നും അവരിലേക്ക് രോഗം പടരാനും അവര്ക്ക് ഗുരുതരമാകാനും സാധ്യതയേറെയാണ്. രോഗലക്ഷണങ്ങളുള്ള കുട്ടികളെ സ്കൂളുകളില് വിടരുത്. അധ്യാപകരും ഇത് പ്രത്യേകം ശ്രദ്ധിക്കേണ്ടതാണ്. എന്തെങ്കിലും ബുദ്ധിമുട്ടുണ്ടെങ്കില് ഡോക്ടറുടെ സേവനം തേടേണ്ടതാണ്. രോഗലക്ഷണങ്ങളുള്ളവര് കോവിഡ് പരിശോധന നടത്തുകയും വിശ്രമിക്കുകയും വേണം. പ്രായമായവര്, മറ്റ് അനുബന്ധ രോഗമുള്ളവര് എന്നിവര്ക്ക് രോഗലക്ഷണങ്ങള് കണ്ടാല് ഉടന് ആരോഗ്യ പ്രവര്ത്തകരെ വിവരമറിയിച്ച് വിദഗ്ധ ചികിൽസ ഉപ്പാക്കണം.
Most Read: വിമാന യാത്രാ നിരക്ക് വർധന: നടപടി ആവശ്യപ്പെട്ട് ജോൺ ബ്രിട്ടാസ് എംപി