തിരുവനന്തപുരം: കോവിഡ് നിയന്ത്രണങ്ങൾ നടപ്പാക്കുന്നത് മാന്യമായ രീതിയിൽ ആയിരിക്കണമെന്ന് സംസ്ഥാനത്തെ പോലീസ് ഉദ്യോഗസ്ഥർക്ക് നിർദ്ദേശം നൽകി ഡിജിപി അനിൽ കാന്ത്. നിയന്ത്രണങ്ങൾ നടപ്പാക്കുന്നതിനിടെ പോലീസുകാരുടെ ഭാഗത്ത് നിന്നുണ്ടാകുന്ന മോശം പെരുമാറ്റത്തെ കുറിച്ചുള്ള പരാതികൾ വ്യാപകമായതോടെയാണ് ഡിജിപി നിർദ്ദേശം നൽകിയിരിക്കുന്നത്.
നിയന്ത്രണങ്ങൾ നടപ്പാക്കേണ്ടത് അങ്ങേയറ്റം മാന്യമായ രീതിയിൽ ആയിരിക്കണമെന്നും, സബ് ഡിവിഷണൽ പോലീസ് ഓഫിസർമാർ ഇക്കാര്യത്തിൽ പ്രത്യേക നിരീക്ഷണം നടത്തണമെന്നും ഡിജിപി വ്യക്തമാക്കി. കോവിഡ്, ട്രാഫിക്ക് നിയന്ത്രണങ്ങളുടെ ചുമതല വഹിക്കുന്ന പോലീസ് ഉദ്യോഗസ്ഥരുടെ പെരുമാറ്റം അതിരുകടക്കുന്നതായി റിപ്പോര്ട്ടുകൾ വ്യാപകമാകുന്നുണ്ട്. ഇതിന്റെ അടിസ്ഥാനത്തിലാണ് ഈ നിര്ദ്ദേശം.
കോവിഡ്, ട്രാഫിക് ഡ്യൂട്ടികൾ നടപ്പാക്കുന്ന പോലീസ് ഉദ്യോഗസ്ഥർ പലപ്പോഴും വളരെ ബുദ്ധിമുട്ടേറിയ സാഹചര്യത്തിലാണ് ജോലി ചെയ്യുന്നത്. എന്നാൽ നിയന്ത്രണങ്ങൾ നടപ്പാക്കുമ്പോൾ പോലീസുകാർ അതിരു വിട്ട് പെരുമാറരുതെന്നും, മാന്യമായ രീതിയിൽ തന്നെ നിയന്ത്രണങ്ങൾ നടപ്പിലാക്കണമെന്നും അദ്ദേഹം കൂട്ടിച്ചേർത്തു.
Read also : രാജ്യത്തെ ആകെ കോവിഡ് രോഗികളിൽ പകുതിയും കേരളത്തിൽ; കേന്ദ്രം