ദുബായ്: കോവിഡ് സുരക്ഷാ മാനദണ്ഡങ്ങളിൽ കൂടുതൽ ഇളവുകളുമായി ദുബായ്. ഇതിന്റെ ഭാഗമായി ഹോട്ടലുകൾ, റസ്‌റ്റോറന്റുകൾ, കഫേകൾ, വിവാഹം ഉൾപ്പടെയുള്ള ചടങ്ങുകൾ നടക്കുന്ന ഹാളുകൾ എന്നിവയിൽ പ്രവേശിക്കാവുന്ന ആളുകളുടെ എണ്ണം വർധിപ്പിച്ചു. ദുബായ് വിനോദ സഞ്ചാര വാണിജ്യ വിപണന വകുപ്പ് പുറത്തിറക്കിയ സർക്കുലറിലാണ് ഇക്കാര്യം വ്യക്‌തമാക്കുന്നത്‌.
ഹോട്ടലുകളിൽ പൂർണതോതിൽ ആളുകൾക്ക് പ്രവേശനം നൽകാമെന്ന് അധികൃതർ വ്യക്‌തമാക്കിയിട്ടുണ്ട്‌. എന്നാൽ അധികൃതർ നൽകിയ മാർഗനിർദേശങ്ങൾ പൂർണമായും പാലിക്കണമെന്നും കർശന നിർദ്ദേശം നൽകിയിട്ടുണ്ട്. കൂടാതെ സിനിമാ തിയറ്റർ, റിക്രിയേഷൻ കേന്ദ്രങ്ങൾ, പ്രദർശനം, മ്യൂസിയം എന്നിവയടക്കമുള്ള വിനോദ കേന്ദ്രങ്ങളിലും 80 ശതമാനം ആളുകളെ പ്രവേശിപ്പിക്കാം.
ബിസിനസ് പരിപാടികളിൽ ബിസിനസ് ഇവന്റ്സ് ചട്ടങ്ങൾ പൂർണമായും പാലിച്ചുകൊണ്ട് 100 ശതമാനം ആളുകൾക്കും പ്രവേശിക്കാം. കൂടാതെ തുറസായ സ്‌ഥലങ്ങളിൽ നടക്കുന്ന സാമൂഹിക പരിപാടികളിൽ 5,000 പേർക്കും, അടച്ച സ്‌ഥലങ്ങളിലെ പരിപാടികളിൽ 2,500 പേർക്കും പങ്കെടുക്കാം. എന്നാൽ പങ്കെടുക്കുന്ന എല്ലാവരും കോവിഡ് വാക്‌സിൻ സ്വീകരിച്ചവർ ആയിരിക്കണം.
Read also: വാക്‌സിൻ ചലഞ്ചിലൂടെ കേരളത്തിന് ലഭിച്ചത് 817 കോടി
