കൊല്ലം: കൊല്ലത്ത് തദ്ദേശ തിരഞ്ഞെടുപ്പിന്റെ ഒന്നാം ഘട്ടത്തിൽ സിപിഎമ്മിന്റെ തിരഞ്ഞെടുപ്പ് ചിഹ്‌നം പതിച്ച മാസ്‌ക് ധരിച്ചെത്തിയ പ്രിസൈഡിങ് ഓഫീസറെ സസ്‌പെന്റ് ചെയ്‌തു. കൊല്ലം ജില്ലയിലെ കൊറ്റക്കര ഗ്രാമപഞ്ചായത്തിലുള്ള കുളശ്ശേരി ബൂത്തിൽ പോളിംഗ് ഓഫീസറായിരുന്ന കെ സരസ്വതിയെയാണ് അന്വേഷണവിധേയമായി സസ്‌പെൻഡ് ചെയ്‌തത്‌. ജില്ലയുടെ ചുമതലയുള്ള തിരഞ്ഞെടുപ്പ് ഉദ്യോഗസ്‌ഥന്റെ റിപ്പോർട്ടിന്റെ അടിസ്‌ഥാനത്തിലാണ് നടപടി.
പോളിംഗ് ബൂത്തിലെ ചുമതലയുണ്ടായിട്ടും, രാഷ്‌ട്രീയ പാർട്ടിയുടെ ചിഹ്‌നം ധരിച്ച് വന്നതിൽ വീഴ്‍ച വരുത്തിയെന്നാണ് ഉദ്യോഗസ്‌ഥന്റെ കണ്ടെത്തൽ.
ചുറ്റിക അരിവാള്‍ നക്ഷത്രം അടയാളം പതിച്ച മാസ്‌ക് ധരിച്ചാണ് ഇവര്‍ ബൂത്തിലെത്തിയത്. സംഭവത്തിൽ യുഡിഎഫ് തിരഞ്ഞെടുപ്പ് കമ്മീഷന് പരാതി നൽകിയിരുന്നു. പരാതിയെത്തുടർന്ന് ഉദ്യോഗസ്‌ഥയെ മാറ്റാന്‍ തിരഞ്ഞെടുപ്പ് കമ്മീഷന് കളക്‌ടർക്ക് നിര്‍ദേശം നൽകുകയായിരുന്നു. ഇതിനെ നിയമപരമായി നേരിടുമെന്ന് ഡിസിസി പ്രസിഡണ്ട് ബിന്ദു കൃഷ്‌ണ പറഞ്ഞിരുന്നു.
National News: തീവ്ര ഇടതുപക്ഷം സമരം ഹൈജാക്ക് ചെയ്‌തെന്ന് പ്രചാരണം; കേന്ദ്രത്തിന്റെ ഗൂഢാലോചനയെന്ന് കർഷകർ
