ദുബായ്: ആറ് മാസത്തിലധികം വിദേശത്ത് കഴിഞ്ഞ പ്രവാസികൾക്ക് യുഎഇയിലേക്ക് മടങ്ങി വരാൻ അനുമതി. 2021 മാർച്ച് 31നുള്ളിൽ രാജ്യത്തേക്ക് മടങ്ങി വരാമെന്നാണ് ഫ്ളൈ ദുബായ്, എയർ ഇന്ത്യ എക്സ്പ്രസ് വിമാനക്കമ്പനികൾ നൽകുന്ന വിവരം. ഇരുകമ്പനികളും യാത്രക്കാർക്ക് നൽകിയ പുതിയ അപ്ഡേറ്റിലാണ് ഇക്കാര്യം അറിയിച്ചത്. കോവിഡ് പ്രതിസന്ധിയിൽ അന്താരാഷ്ട്ര വിമാന സർവീസുകൾ നിർത്തിവെച്ചതോടെ പല രാജ്യങ്ങളിലായി നിരവധി പ്രവാസികളാണ് കുടുങ്ങിക്കിടക്കുന്നത്.
യുഎഇ റസിഡന്റ് വിസ കൈവശം വെക്കുകയും 180 ദിവസത്തിലേറെ രാജ്യത്തിന് പുറത്ത് താമസിക്കുകയും ചെയ്താൽ മാർച്ച് 31 വരെ യുഎഇയിലേക്ക് പ്രവേശിക്കാൻ അനുവദിക്കുമെന്നാണ് വിമാനക്കമ്പനികൾ പറയുന്നത്. കൊറോണ വൈറസ് വ്യാപനത്തിനിടെ യുഎഇക്കും ഇന്ത്യക്കുമിടയിൽ ഏറ്റവും കൂടുതൽ യാത്രക്കാരെ കയറ്റിയ ഇന്ത്യൻ വിമാനക്കമ്പനി എയർ ഇന്ത്യ എക്സ്പ്രസ് ഇക്കാര്യം സോഷ്യൽ മീഡിയയിലൂടെയും വ്യക്തമാക്കിയിരുന്നു.
ടിക്കറ്റ് ബുക്ക് ചെയ്യുന്നതിന് മുമ്പ് ദുബായിലെ ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്സ് അഫയേഴ്സിൽ നിന്നുള്ള അനുമതി ഉറപ്പാക്കണമെന്നും നിർദ്ദേശമുണ്ട്.
Also Read: റിപ്പബ്ളിക്ക് ദിന ആഘോഷങ്ങൾ ഒഴിവാക്കണമെന്ന് ശശി തരൂർ