തിരുവനന്തപുരം : കളമശ്ശേരി മെഡിക്കല്‍ കോളേജില്‍ കോവിഡ് ബാധിച്ചു ചികില്‍സയില്‍ കഴിഞ്ഞിരുന്ന ഹാരിസിന്റെ മരണത്തില്‍ ആശുപത്രി അധികൃതരുടെ വാദം തള്ളി ഹാരിസിന്റെ കുടുംബാംഗങ്ങള്‍. ഹാരിസിന്റെ മരണത്തിന് കാരണം ജീവനക്കാരുടെ അനാസ്‌ഥ അല്ലെന്നും, ന്യുമോണിയയെ തുടര്‍ന്ന് ഹൃദയ സ്‌തംഭനം മൂലമാണ് ഹാരിസ് മരിച്ചതെന്നുമാണ് മെഡിക്കല്‍ കോളേജ് അധികൃതര്‍ വ്യക്‌തമാക്കിയത്. എന്നാല്‍ ആശുപത്രി അധികൃതരുടെ ഈ വാദം തള്ളി കൊണ്ട് ഇപ്പോള്‍ കുടുംബാംഗങ്ങള്‍ രംഗത്ത് വന്നിട്ടുണ്ട്.
ഹാരിസ് മരിച്ചത് ഹൃദയ സ്‌തംഭനം മൂലമാണെന്ന് ആശുപത്രി അധികൃതര്‍ ഇതുവരെ തങ്ങളോട് പറഞ്ഞിട്ടില്ല എന്ന് ഹാരിസിന്റെ കുടുംബം വ്യക്‌തമാക്കി. ശ്വാസകോശത്തില്‍ ഉണ്ടായ അണുബാധ ആണ് കാരണം എന്നാണ് അറിയിച്ചത്. കൂടാതെ ഹാരിസിന് മറ്റ് രോഗങ്ങള്‍ ഉള്ളതായി ആശുപത്രി അധികൃതരോ ഹാരിസോ തങ്ങളോട് പറഞ്ഞിരുന്നില്ല. ഐസിയുവില്‍ നിന്നും ഉടന്‍ തന്നെ റൂമിലേക്ക് മാറ്റാമെന്നാണ് തങ്ങളോട് പറഞ്ഞിരുന്നത് എന്നും കുടുംബം അറിയിച്ചു. ഐസിയുവില്‍ നിന്നും ഉടനെ മാറ്റാമെന്ന് പറഞ്ഞതിനിടെയാണ് ഹാരിസ് മരണപ്പെടുന്നത്. മരണത്തില്‍ ഇപ്പോള്‍ ആശുപത്രി അധികൃതര്‍ ഉന്നയിക്കുന്ന വാദങ്ങള്‍ ഇതിന് കാരണക്കാരായവരെ രക്ഷിക്കാന്‍ വേണ്ടി ആണെന്ന് കുടുംബാംഗങ്ങള്‍ ആരോപിച്ചു.
ഹാരിസിന്റെ മരണവുമായി ബന്ധപ്പെട്ട് കളമശ്ശേരി പോലീസ് ഇന്ന് മൊഴിയെടുക്കും. ആശുപത്രി അധികൃതരുടെ വീഴ്‌ച കൊണ്ടാണ് മരണം സംഭവിച്ചത് എന്ന് വ്യക്‌തമാക്കുന്ന നഴ്സിംഗ് ഓഫീസറുടെ ശബ്‌ദ രേഖ കൂടുതല്‍ വിവാദങ്ങള്‍ ഉണ്ടാക്കിയ സാഹചര്യത്തിലാണ് പോലീസ് മൊഴിയെടുക്കുന്നത്. ഹാരിസിന്റെ മരണവുമായി ബന്ധപ്പെട്ട് ബന്ധുക്കളുടെയും ആശുപത്രി ജീവനക്കാരുടെയും മൊഴി ഇന്ന് പോലീസ് രേഖപ്പെടുത്തും.
Read also : ഹാരിസ് മരണം; പോലീസ് ഇന്ന് കളമശ്ശേരിയില്‍ എത്തി മൊഴിയെടുക്കും
