വയനാട്: ജില്ലയിലേക്ക് കൂടുതൽ ആളുകളെ ആകർഷിക്കുന്നതിനായി ഇക്കോ ടൂറിസം പദ്ധതിയുമായി വനംവകുപ്പ്. വയനാട് കൊളവള്ളിയിലെ കബനി തീരത്തുള്ള 40 ഏക്കർ സ്‌ഥലത്താണ്‌ പദ്ധതി നടപ്പിലാക്കുന്നത്. പദ്ധതിയിലൂടെ കേരള-കർണാടക അതിർത്തിയിലെ ടൂറിസം പദ്ധതി കൂടുതൽ സഞ്ചാരികളെ ആകർഷിക്കുമെന്നാണ് പ്രതീക്ഷിക്കുന്നത്.
മുള്ളൻകൊല്ലി പഞ്ചായത്തിലെ കൊളവള്ളിയിൽ വനംവകുപ്പിന്റെ 40 ഏക്കറോളം സ്‌ഥലമുണ്ട്. കൊളവള്ളി പാടശേഖരത്തിന് അടുത്താണിത്. ഇവിടെ ഇക്കോ ടൂറിസം പദ്ധതി ആരംഭിക്കണമെന്ന ആവശ്യം നേരത്തെ ഉയർന്നിരുന്നു. ഈ സ്‌ഥലത്ത്‌ തടാകം നിർമിക്കാനാണ് പദ്ധതി. സന്ദർശകർക്കായി ബോട്ടിങ്ങാണ് ലക്ഷ്യമിടുന്നത്. കുട്ടികൾക്കായി പാർക്കും നിർമിക്കും.
പദ്ധതി നടത്തിപ്പിന് വനം വികസന സമിതി രൂപീകരിക്കാനാണ് തീരുമാനം. ഇതിന്റെ ഭാഗമായുള്ള കൂടിയാലോചനകൾ ആരംഭിച്ചിട്ടുണ്ട്. പ്രകൃതി രമണീയമായ കൊളവള്ളിയിലെ ഇക്കോ ടൂറിസം പദ്ധതി സഞ്ചാരികളെ വൻതോതിൽ ആകർഷിക്കുമെന്നാണ് വനംവകുപ്പിന്റെ പ്രതീക്ഷ.
Most Read: പാഠ്യ പദ്ധതിയിൽ പരിസ്‌ഥിതി സംരക്ഷണം ഉൾപ്പെടുത്താൻ തീരുമാനിച്ച് റൊമാനിയ
