മൂന്നു വർഷങ്ങൾക്കു ശേഷം ആപ്പിൾ വാച്ചിൽ ഗൂഗിൾ മാപ്പ് തിരിച്ചെത്തി. വരുന്ന ആഴ്‌ചകളിൽ ലോകവ്യാപകമായി ഇത് ലഭ്യമാക്കുമെന്ന് ഗൂഗിൾ പ്രഖ്യാപിച്ചു. നേരത്തെ ആപ്പിൾ വാച്ച് ഉപയോക്താക്കൾക്ക് ഗൂഗിൾ മാപ്പ് ലഭ്യമായിരുന്നുവെങ്കിലും 2017 ൽ ഇത് പിൻവലിക്കുകയായിരുന്നു. ഇതിന്റെ കാരണം വ്യക്തമാക്കാതിരുന്ന കമ്പനി ഇനി ഗൂഗിൾ മാപ്പ് ആപ്പിൾ വാച്ചിൽ തിരികെ എത്തുമോ എന്ന ചോദ്യത്തിനും മറുപടി നൽകിയിരുന്നില്ല.
എന്നാൽ, ഒരു ഇടവേളക്കു ശേഷം ഗൂഗിൾ മാപ്പ് ആപ്പിൾ വാച്ചിൽ തിരിച്ചെത്തിയിരിക്കുകയാണ്. ഗൂഗിൾ മാപ്പ് ഉപയോക്താക്കൾക്ക് പരസ്പരം ഫോളോ ചെയ്യാനുള്ള സൗകര്യവും ഗൂഗിൾ ഒരുക്കുന്നുണ്ട്. ഇതുവഴി ഉപയോക്താക്കൾ പങ്കുവെച്ച ചിത്രങ്ങൾ, റിവ്യൂ എന്നിവയെല്ലാം മറ്റുള്ളവർക്ക് കാണാൻ സാധിക്കും.
കോവിഡ്-19ന്റെ പശ്ചാത്തലത്തിൽ കോവിഡുമായി ബന്ധപ്പെട്ട ഗതാഗത നിന്ത്രണങ്ങൾ സംബന്ധിച്ച് മുന്നറിയിപ്പ് നൽകുന്ന സൗകര്യവും ഗൂഗിൾ മാപ്പിൽ ഒരുക്കിയിട്ടുണ്ട്. കൂടാതെ ആപ്പിളിന്റെ കാർപ്ലേ ഡാഷ്‌ബോർഡ് വ്യൂവിലും ഗൂഗിൾ മാപ്പ് സേവനം ലഭ്യമാകുമെന്നും ബ്ലോഗ് പോസ്റ്റിലൂടെ ഗൂഗിൾ അറിയിച്ചു.
