തിരുവനന്തപുരം: വിജയ്. പി. നായരെ കൈയേറ്റം ചെയ്ത കേസില് ഭാഗ്യലക്ഷ്മിയുടെയും സുഹൃത്തുക്കളുടെയും ജാമ്യാപേക്ഷയെ സര്ക്കാര് എതിര്ത്തു. ജാമ്യം നല്കിയാല് തെറ്റായ സന്ദേശമാകും സമൂഹത്തില് എത്തുകയെന്ന കണ്ടെത്തലിനെ തുടര്ന്നാണ് സര്ക്കാര് കോടതിയില് എതിര്പ്പ് അറിയിച്ചത്. ഈ മാസം 9ന് ജാമ്യാപേക്ഷയില് തീരുമാനം ഉണ്ടാകും. തിരുവനന്തപുരം രണ്ടാം അഡീഷണല് സെഷന്സ് കോടതിയാണ് അപേക്ഷ പരിഗണിക്കുന്നത്.
സ്ത്രീകള്ക്കെതിരെ സോഷ്യല് മീഡിയയിലൂടെ അപകീര്ത്തികരമായ പരാമര്ശം നടത്തിയതിനാണ് വിജയ് പി നായരെ ഡബ്ബിംഗ് ആര്ട്ടിസ്റ്റ് ഭാഗ്യലക്ഷ്മി, ദിയ സന, ശ്രീലക്ഷ്മി എന്നിവര് ചേര്ന്ന് കൈയേറ്റം ചെയ്തത്. തുടര്ന്ന് വിജയ് പി നായരുടെ പരാതിയില് തമ്പാനൂര് പൊലീസാണ് മൂന്ന് പേരെയും പ്രതി ചേര്ത്ത് ജാമ്യമില്ലാ വകുപ്പ് പ്രകാരം കേസെടുത്തത്. കേസില് മുന്കൂര് ജാമ്യാപേക്ഷ പരിഗണിക്കവെയാണ് സര്ക്കാര് എതിര്പ്പ് പ്രകടിപ്പിച്ചത്.
വിജയ് പി നായരെ കൈയേറ്റം ചെയ്ത സ്ത്രീകള്ക്കെതിരെയും നിയമ നടപടി ഉറപ്പാക്കണമെന്ന് മനുഷ്യാവകാശ കമ്മീഷനും ഇന്നലെ നിലപാട് വ്യക്തമാക്കിയിരുന്നു. നിയമം കൈയ്യിലെടുക്കാന് ആര്ക്കും അധികാരമില്ലെന്ന വിലയിരുത്തലിന്റെ അടിസ്ഥാനത്തിലാണ് കമ്മീഷന്റെ ഉത്തരവ്.
അതേസമയം, സമൂഹമാദ്ധ്യമങ്ങളില് വ്യക്തിപരമായി അധിക്ഷേപിച്ചെന്ന ഭാഗ്യലക്ഷ്മിയുടെ പരാതിയില് സംവിധായകന് ശാന്തിവിള ദിനേശിനെതിരെയും അന്വേഷണം തുടരുകയാണ്.
Read Also: നടന് ടൊവിനോ തോമസിന് സിനിമാ ചിത്രീകരണത്തിനിടെ പരിക്ക്