പെട്ടിമുടി : ഇടുക്കി രാജമലയിലെ പെട്ടിമുടിയില്‍ ഉണ്ടായ ദുരന്തത്തില്‍ പരിക്കേറ്റവര്‍ക്കും, മരിച്ചവരുടെ കുടുംബങ്ങള്‍ക്കും ധനസഹായവുമായി തമിഴ്‌നാട് സര്‍ക്കാര്‍. ദുരന്തത്തില്‍ മരിച്ചവരുടെ കുടുംബത്തിന് 3 ലക്ഷം രൂപ വീതവും ഗുരുതരമായി പരിക്കേറ്റവര്‍ക്ക് ഒരു ലക്ഷം രൂപ വീതവുമാണ് സഹായം. ധനസഹായം പ്രഖ്യാപിച്ചത് തമിഴ്‌നാട് മുഖ്യമന്ത്രി എടപ്പാടി പളനിസ്വാമിയാണ്. പെട്ടിമുടി ദുരിതബാധിതര്‍ക്ക് നേരത്തെ തന്നെ സംസ്ഥാന സര്‍ക്കാരും കേന്ദ്ര സര്‍ക്കാരും സഹായം പ്രഖ്യാപിച്ചിരുന്നു.
ഓഗസ്റ്റ് ഏഴാം തീയതിയാണ് രാജമലയിലെ പെട്ടിമുടിയില്‍ ഉരുള്‍പൊട്ടല്‍ ഉണ്ടായത്. 80 ല്‍ അധികം ആളുകള്‍ താമസിച്ചിരുന്ന 30 മുറികള്‍ ഉള്ള 4 ലയങ്ങള്‍ ഉരുള്‍പൊട്ടലില്‍ തകര്‍ന്നു. 62 പേരുടെ മൃതദേഹങ്ങള്‍ ഇതുവരെ കണ്ടെടുത്തു. ഇനിയും കണ്ടെത്താനുള്ളവര്‍ക്കായി തിരച്ചില്‍ തുടരുകയാണ്.
അപകടത്തില്‍ മരിച്ചവരുടെ കുടുംബാംഗങ്ങള്‍ക്ക് 5 ലക്ഷം രൂപ വീതം സംസ്ഥാന സര്‍ക്കാര്‍ സഹായധനം പ്രഖ്യാപിച്ചിരുന്നു. ഒപ്പം തന്നെ പരിക്കേറ്റവരുടെ ചികിത്സച്ചിലവും, മരിച്ചവരുടെ മക്കളുടെ തുടര്‍പഠനവും സംസ്ഥാന സര്‍ക്കാരാണ് വഹിക്കുന്നത്. കൂടാതെ ദുരിതബാധിതര്‍ക്ക് കേന്ദ്രം രണ്ട് ലക്ഷം രൂപയും സഹായവാഗ്ദാനം ചെയ്തിട്ടുണ്ട്.
