ഇടുക്കി: മാസങ്ങള് നീണ്ട ഇടവേളക്ക് ശേഷം ഇടുക്കി അണക്കെട്ടില് സഞ്ചാരികള്ക്ക് പ്രവേശനാനുമതി നല്കി. ശനി, ഞായര് ദിനങ്ങളിലാണ് പ്രവേശനത്തിന് അനുമതി. കോവിഡ് പ്രോട്ടോകോള് കര്ശനമായി പാലിക്കണമെന്നാണ് നിര്ദേശം. ജലാശയത്തിലെ ജലനിരപ്പ് 2394 അടി ആയതോടെ, അപൂര്വ്വ കാഴ്ച ആസ്വദിക്കുവാന് സഞ്ചാരികള്ക്ക് സുവര്ണാവസരമാണ്.
ഇതോടൊപ്പം ഹില്വ്യൂ പാര്ക്കിന്റെ പ്രവര്ത്തനം ആരംഭിച്ചതും ഇടുക്കി ജലാശയത്തില് ബോട്ടിങ് തുടങ്ങിയതും സഞ്ചാരികളെ ആകര്ഷിക്കും. 10 വയസില് താഴെയുള്ളവരെയും 60 വയസ് കഴിഞ്ഞവരെയും ബോട്ടിലും ബഗ്ഗികാറിലും യാത്ര അനുവദിക്കില്ല. അണക്കെട്ട് സന്ദര്ശിക്കുന്നതിന് 25 രൂപയാണ് ഫീസ്. ഹില്വ്യൂ പാര്ക്ക് സന്ദര്ശനവും ബോട്ടിങ്ങും എല്ലാ ദിവസവുമുണ്ട്. 20 പേര്ക്ക് സഞ്ചരിക്കാവുന്ന ബോട്ടില് സാമൂഹിക അകലം പാലിക്കേണ്ടതിനാല് 10 പേര്ക്ക് മാത്രമേ യാത്ര ചെയ്യാന് കഴിയൂ. വനംവകുപ്പിന്റെ മേല്നോട്ടത്തിലാണ് ബോട്ടിംഗ്.