പാലക്കാട്: കല്ലട ട്രാവൽസിന്റെ ദീർഘദൂര ബസ് മറിഞ്ഞു അപകടം. പാലക്കാട് ജില്ലയിലെ തിരുവാഴിയോട് കാർഷിക വികസന ബാങ്കിന് മുന്നിൽ ഇന്ന് രാവിലെ 7.45നാണ് അപകടം നടന്നത്. അപകടത്തിൽ രണ്ടുപേർ മരിച്ചതായി ഒറ്റപ്പാലം എംഎൽഎ പ്രേംകുമാർ വ്യക്തമാക്കി. എന്നാൽ, ഔദ്യോഗിക സ്ഥിരീകരണം വന്നിട്ടില്ല. അപകട സമയത്ത് ജീവനക്കാർ ഉൾപ്പടെ 38 പേരാണ് ബസിൽ ഉണ്ടായിരുന്നത്. ഇവരിൽ രണ്ടുപേരുടെ നില അതീവ ഗുരുതരമാണെന്നാണ് റിപ്പോർട്.
ബെംഗളൂരുവിൽ നിന്ന് കോഴിക്കോടേക്ക് പോവുകയായിരുന്ന ബസാണ് അപകടത്തിൽപ്പെട്ടത്. കാർഷിക വികസന ബാങ്കിന് മുന്നിലെത്തിയ ബസ് നിയന്ത്രണം വിട്ടു മറിയുകയായിരുന്നു. ബസിനടിയിൽ പെട്ടവർക്കാണ് ഗുരുതരമായി പരിക്കേറ്റത്. പരിക്കേറ്റവരെ നാട്ടുകാരും പോലീസും ഫയർഫോഴ്സും ചേർന്ന് സമീപത്തെ ആശുപത്രിയിലേക്ക് മാറ്റി. ഒറ്റപ്പാലം എംഎൽഎ സ്ഥലത്തെത്തിയിട്ടുണ്ട്. തിരുവാഴിയോട് ഇറക്കത്തിൽ വെച്ചാണ് അപകടം ഉണ്ടായത്. നിയന്ത്രണം വിട്ട ബസ് റോഡിന് നടുവിൽ തന്നെ മറിയുകയായിരുന്നു.
Most Read| റെയ്ഡ് അവസാനിച്ചു; ഇഡി പരിശോധന അജണ്ടയുടെ ഭാഗമെന്ന് എസി മൊയ്തീൻ