രാജ്യത്തെ ടെലികോം മേഖലയിൽ അടിക്കടി മാറ്റങ്ങൾ കൊണ്ട് വരാൻ ശ്രമിക്കുന്ന സേവനദാതാക്കളാണ് ജിയോയും എയർടെല്ലും എല്ലാം. ഓരോ കാലത്തും ഉപഭോക്താക്കളുടെ താൽപര്യങ്ങൾ തിരിച്ചറിഞ്ഞുകൊണ്ട് പുതിയ ഓഫറുകൾ അവതരിപ്പിക്കാൻ ശ്രദ്ധിക്കുന്നവയാണ് ഇവ ഓരോന്നും. ഏറ്റവും അവസാനമായി കൂടുതൽ മെച്ചപ്പെട്ട പ്ലാനുകൾ കൊണ്ട് വരികയും പഴയവ ഒഴിവാക്കുകയും ചെയ്തത് ഈയടുത്താണ്. അതിനെക്കുറിച്ച് കൂടുതൽ അറിയാൻ ശ്രമിക്കാം.
ഭാരതി എയർടെൽ :
ദീർഘകാലാടിസ്ഥാനത്തിലുള്ള പ്ലാനുകളിലാണ് എയർടെൽ കൂടുതൽ മാറ്റങ്ങൾ കൊണ്ട് വന്നിരിക്കുന്നത്. നിലവിലുള്ള 2398 രൂപയുടെ പ്ലാൻ പൂർണമായും ഒഴിവാക്കിയ എയർടെൽ 2498 രൂപയ്ക്ക് കൂടുതൽ മെച്ചപ്പെട്ട സേവനങ്ങളാണ് വാഗ്ദാനം ചെയ്യുന്നത്, പഴയ പ്ലാനിൽ 365 ദിവസത്തേക്ക് പ്രതിദിനം 1.5 ജിബി ഡാറ്റയും ദിവസം 100 എസ്എംഎസുകളും അൺലിമിറ്റഡ് കോളും ഉണ്ടായിരുന്ന സ്ഥാനത്ത് പുതിയതിൽ പ്രതിദിന ഡാറ്റാ പരിധി 2 ജിബിയാണ്.
എയർടെൽ താങ്ക്സ് ആപ്പിലൂടെ സൗജന്യ ഡാറ്റാ കൂപ്പണുകൾ ലഭ്യമാക്കുന്നതിലൂടെ മുൻകൂട്ടി തിരഞ്ഞെടുത്ത റീചാർജുകളിൽ ഇളവുകൾ ലഭിക്കും, 199, 219, 249, 279, 299 തുടങ്ങിയ ഓഫറുകൾ ഈ സെഗ്മെന്റിൽ ലഭ്യമാണ്.
വൊഡാഫോൺ-ഐഡിയ :
819 രൂപയുടെ പുതിയ പ്രീപൈഡ് പ്ലാൻ ആണ് കമ്പനി അവതരിപ്പിച്ച ഏറ്റവും പുതിയ ഓഫർ. 84 ദിവസത്തേക്ക് പ്രതിദിനം 2 ജിബി ഡാറ്റയും അൺലിമിറ്റഡ് കോളും ഈ പ്ലാനിൽ ലഭിക്കും. നിലവിൽ ഡൽഹി സർക്കിലിനു കീഴിൽ മാത്രം നടപ്പിലാക്കിയിട്ടുള്ള ഈ പ്ലാൻ വൈകാതെ മുഴുവൻ സർക്കിളുകളിലും അവതരിപ്പിക്കും എന്നാണ് കരുതുന്നത്.
റിലയൻസ് ജിയോ :
ജിയോ തങ്ങളുടെ ഇന്റർനാഷണൽ റോമിംഗ്, ഐഎസ്ഡി തുടങ്ങിയ വിഭാഗങ്ങളിലെ ഓഫറുകളാണ് പരിഷ്കാരിച്ചിരിക്കുന്നത്. 501 രൂപയുടെ ഐഎസ്ഡി പ്ലാനിൽ ആകെ ടോക്ക്ടൈം 424.58 രൂപയായി പരിമിതപ്പെടുത്തി, ഈ ഓഫറിൽ 200ൽ അധികം രാജ്യങ്ങളിലേക്കുള്ള സേവനം ലഭ്യമാകും.
ഇത്തരത്തിൽ ഇന്റർനാഷണൽ റോമിംഗ് വിഭാഗത്തിലെ രണ്ട് ഓഫറുകളും പരിഷ്കരിച്ചിട്ടുണ്ട്. 1101, 1201 രൂപകളുടെ പ്ലാനുകളിൽ ഇനി മുതൽ യഥാക്രമം 933.05, 1017.80 എന്നിങ്ങനെ ആകും ടോക്ക് ടൈമുകൾ ലഭ്യമാവുക.