കോഴിക്കോട്: തൊണ്ടയാട് കെട്ടിടത്തിന്റെ സ്ളാബ് പൊട്ടി വീണ് ഉണ്ടായ അപകടത്തിൽപ്പെട്ട ഒരാൾ കൂടി മരിച്ചു. തമിഴ്നാട് സ്വദേശിയായ സലീം ആണ് മരിച്ചത്. ഇതോടെ അപകടത്തിൽ മരിച്ചവരുടെ എണ്ണം രണ്ടായി. തമിഴ്നാട് സ്വദേശിയായ കാർത്തിക് (22) അപകടം നടന്ന് നിമിഷങ്ങൾക്കകം മരിച്ചിരുന്നു.
കോഴിക്കോട് തൊണ്ടയാട് ബൈപ്പാസിന് സമീപം നിർമാണത്തിലിരിക്കുന്ന കെട്ടിടത്തിലെ സ്ളാബ് പൊട്ടിവീണാണ് അപകടം ഉണ്ടായത്. ഇന്ന് രാവിലെയാണ് അപകടം ഉണ്ടായത്. അതേസമയം, അപകടത്തിൽ പരിക്കേറ്റ തമിഴ്നാട് സ്വദേശികളായ തങ്കരാജ്, ജീവ, കന്നസ്വാമി എന്നിവർ കോഴിക്കോട് മെഡിക്കൽ കോളേജ് ആശുപത്രിയിൽ ചികിൽസയിലാണ്.
കെട്ടിടത്തിന് താഴെ ജോലികളിൽ ഏർപ്പെട്ടിരുന്നവരുടെ ദേഹത്തേക്ക് മുകളിൽ നിന്നും സ്ളാബ് പൊട്ടിവീഴുകയായിരുന്നു. സ്ളാബിന് താങ്ങായി നിർത്തിയ തൂൺ തെന്നിമാറിയതാണ് അപകട കാരണം. നിർമാണ പ്രവർത്തനങ്ങളിൽ ഏർപ്പെട്ടിരുന്ന അഞ്ചു പേരാണ് അപകടത്തിൽപ്പെട്ടത്. പോലീസും ഫയർ ഫോഴ്സും സ്ഥലത്തെത്തി സ്ളാബുകൾ നീക്കം ചെയ്തു.
Read Also: കോഴിക്കോട് നിർമാണം നടക്കുന്ന കെട്ടിടത്തിന്റെ സ്ളാബ് പൊട്ടി വീണ് ഒരാൾ മരിച്ചു