കണ്ണൂർ: ബിജെപി സംസ്ഥാന അധ്യക്ഷൻ കെ സുരേന്ദ്രനും ജനാധിപത്യ രാഷ്ട്രീയ പാര്ട്ടി നേതാവ് പ്രസീത അഴീക്കോടും തമ്മിലുള്ള പുതിയ ശബ്ദരേഖ പുറത്ത്. സികെ ജാനുവിനെ കാണാനായി ഹോട്ടലിലെത്തും മുൻപ് സുരേന്ദ്രൻ വിളിച്ച ഫോൺ കോളിലെ സംഭാഷണമാണ് പ്രസീത പുറത്തുവിട്ടത്.
സികെ ജാനുവുമായുള്ള കാര്യങ്ങളൊന്നും പികെ കൃഷ്ണദാസ് അറിയരുതെന്നാണ് ശബ്ദരേഖയിൽ സുരേന്ദ്രൻ പറയുന്നത്. ആര് അറിയരുതെന്നാണ് പറയുന്നതെന്ന് പ്രസീത എടുത്ത് ചോദിക്കുന്നുണ്ട്. കൃഷ്ണദാസെന്ന് സുരേന്ദ്രന് പറയുമ്പോള് അവര് അറിയാന് ഇടയില്ലെന്നാണ് പ്രസീത മറുപടി പറയുന്നത്. ബാഗില് പണവുമായി കുറേ ദിവസമായി നടക്കുകയാണെന്നും കെ സുരേന്ദ്രന് പറയുന്നുണ്ട്. ഫോണ് സംഭാഷണം തന്റെ തന്നെയാണെന്ന് പ്രസീത വ്യക്തമാക്കി.
മഞ്ചേശ്വരം കോഴക്കേസിൽ ഉൾപ്പടെ പ്രതിക്കൂട്ടിൽ നിൽക്കുന്ന കെ സുരേന്ദ്രനെ കൂടുതല് പ്രതിരോധത്തിലാക്കുന്നതാണ് പുതിയ വെളിപ്പെടുത്തല്. എന്ഡിഎയില് ചേരാന് സികെ ജാനുവിന് കെ സുരേന്ദ്രന് 10 ലക്ഷം രൂപ നല്കിയെന്ന വെളിപ്പെടുത്തലുമായി പ്രസീത അഴീക്കോട് നേരത്തെ രംഗത്തെത്തിയിരുന്നു. ഇത് തെളിയിക്കുന്ന, കെ സുരേന്ദ്രനുമായുള്ള പ്രസീതയുടെ ഫോൺ സംഭാഷണവും പുറത്തുവന്നിരുന്നു.
Most Read: കോവിഡ് മരണം; 28ന് മുൻപ് റിപ്പോർട് സമർപ്പിക്കണമെന്ന് തമിഴ്നാട് ഹൈക്കോടതി